Beraien proiektuarekin eskubideak zabaldu eta udal zerbitzuetarako sarbide unibertsala erraztuko dutela diote
Aritz Elgarresta Berasategi eta Irati Arratibel Gonzalez de Duranak Zumarragako EH Bilduk udal zerga eta tasen inguruan landu duen proposamena aurkeztu dute. Gaia biharko (asteartea) osoko bilkuran landuko da. EH Bilduren proposamenaren ardatzak, “proposamen fiskal justu eta progresibo baten bidez”, udal aberastasunaren banaketa, etxebizitzarako eskubidea eta gazteen emantzipazioa dira.
Elgarresta bozeramailearen hitzetan “adinez nagusiak izan eta 15.709 eurotik beherako errenta dutenek (Zumarragako emakumeen errentaren bataz-bestekoa) udalak eskaintzen dituen zerbitzu nagusietan (kiroldegia, Arte Ederren Eskola edota Zelai Ariztiko ikastaroak…) %100eko hobaria izango dute. Eta 21.193 eurotako errentaren azpitik daudenek, aldiz, %50eko hobaria izango dute. Hobaria subjektiboa eta pertsonala izango da baina adinez nagusiak ez diren pertsonen kasuan bizikidetza unitateko errenta hartuko da kontuan, horretarako beste hobari taula bat landu dugularik. Langabezian dauden edo RGIa jasotzen duten pertsonek, beraien zaurgarritasun egoera egiaztatuta dagoela kontuan hartuta, 100%eko hobaria izango dute kiroldegian eta Zelai Ariztiko ikastaroetan”.
Elgarrestak beraien proposamenaren helburua eskubideak zabaltzea eta udal zerbitzuetara sarbidea erraztea dela dio. “Gaitasun ekonomiko eza eta errekurtso falta ezin dira udal zerbitzuetarako sarbidea izateko oztopo izan. Hau da, errekurtso gabezia ez dadila izan familia batzuek beraien seme-alabak kiroldegira ezin eraman ahal izateko arrazoia. Eta ez dadila inor arrazoi bereberagatik ikastaroetan parte hartzeko aukerarik gabe gelditu. Zaurgarritasun kasuetan indartu behar diren laguntza sozialetatik haratago, eskubideak herritar guztioi zabaldu eta zumarragar guztiei udal zerbitzuetarako sarbide unibertsala errazteaz ari gara. Beste ikuspuntu bat da eta honela, pertsona edo bizikidetza unitate bakoitzaren gaitasun ekonomikoaren araberakoa izango da udal kutxarako ekarpena”, zehaztu du Elgarretsak.
Elgarrestaren arabera “proposamenaren bideragarritasun teknikoaren inguruan zalantzarik ez dago. Honen harira esan, udalaren etxez-etxeko zerbitzua familia bakoitzaren gaitasun ekonomikoaren arabera ordaintzen dela eta sozialki aurreratuta dauden Usurbil eta Errenteria bezalako udaletan berme tekniko eta juridiko guztiekin aplikatzen dela. Borondatea izan eta lanketa bat aurrera eramanez gero, posible da”, gehitu du Elgarrestak. “Juridiko eta teknikoki erabat bideragarria da”.
Elgarrestak Zumarragaren errealitate sozioekonomikoaren diagnostikoa egin du eta baieztatu duenez, “zoritxarrez geroz eta egoera konplikatuago” baten aurrean gaude. “Langabezia tasari dagokionez, Gipuzkoan azkenengo postuetan gaude, RGIa jasotzen dutenen kopurua goraka doan bitartean; gizarte zerbitzuetara jotzen duten familiak gehitzen ari dira eta gure errenta maila Gipuzkoako bataz-bestekotik behera dago; guzti honi prezio eta hipoteken igoerarekin eta diferentzia handiz EAEko urik garestiena ordaintzen dugula ahaztu gabe”.
Zumarragako EH Bilduk zergak, tasak eta prezio publikoak %1,9ko igotzea proposatu du. “Udalaren gaitasun ekonomikoa indartu behar dela iruditzen zaigu, baina modu orekatu batean, progresiboki eta epe luzeko begiradarekin. Era berean, herritar askok bizi duten egoera zailaz jabetzen gara. Zergak hauteskunde bezperatan izoztu eta legegintzaldi hasieran, familien egoera ekonomikoa geroz eta zailagoa den honetan, KPIaren oso gainetik igotzea, hobarien gehikuntza eta progresibitate irizpiderik gabe, ez zaigu bidezkoa iruditzen”.
Bukatzeko, aurreko udalbatzan onartutako mozioaren balioa gogora ekarri nahi izan du Arratibelek. “Mozio horren arabera, udalak Zumarraga eremu tentsionatu izendatzeko konpromisoa hartu zuen eta baita etxebizitzarako eskubidea eta gazteen emantzipazioa errazteko mekanismo egokiak martxan jartzekoa ere. Erabiltzen ez diren etxe hutsak ez zergapetzeko aitzakiarik ez dago eta udalak etxe hutsen parkea mobilizatu eta zentzuzko alokairu prezioa duten etxebizitzen eskaintza handitzeko mekanismoak martxan jarri behar ditugu”. Azkenik, energetikoki etxebizitza berriztatu nahi dutenentzako, IBIan %50eko hobaria jasotzen duen proposamena azpimarratu du. “Gure etxebizitza parkearen birgaitzea eta etxebizitza hutsak mugitzea ezinbestekoak dira etxebizitzarako sarbidea eta gazteen emantzipazioa errazteko”, amaitu du Arratibelek.
