Jose Quintas gitarra irakaslearen ikasleek eta lagunek omenaldia eskaini diote
Jose Quintas hainbat musika eskolatan gitarra eskolak eman zituen musika irakasle bat izan zen. Abuztuan hil zen, bihotzekoak jota. Musika eta irakaskuntza pasioz bizi zituen eta arrastoa utzi zuen.
Hala, bere ikasleek eta lagunek omenaldia eskaini zioten larunbatean Urretxun eta Zumarragan. Izan ere, Secundino Esnaola musika eskolako irakaslea izan zen. Omenaldiak bi zati izan zituen. Arratsaldean bere ikasle ohiek Zelai Arizti parkeko karpan jo zuten. 47 musikarik 40 abesti jo zituzten. Gauean, berriz, Alter Ego eta Zatekeen taldeek gaztetxean jo zuten.
Alter Ego taldeko Aitor Carrascok omenaldia “oso polita” izan zela dio. “Oso gustura egon ginen. Arratsaldeko kontzertura guraso asko hurbildu ziren eta gauean gazte asko elkartu ziren. Jose Quintasen familia ere etorri zen”.
Bai Alter Ego eta bai Zatekeen Quintasek lagunduta jaio ziren. Izan ere, Quintasek talde askoren sorrera bultzatu zuen. Gazteei musika eskolatik kanpo zegoen mundua erakusten zien. Jendaurrean jotzera animatzen zituen eta ondoren libre uzten zituen. Musika txoko guztietara eramateko lan egin zuen. Horretarako, gazteei musikarekiko pasioa transmititu zien.
Jesukristok hamabi apostolurekin itzela egin bazuen, zer ez ote dute egingo Quintasen ehunka apostoluek…
