Gaur arratsaldean, ordu berean, aparteko osoko bilkurak egin dituzte Urretxun eta Zumarragan. Bietan EAJk eta PSE-EEk elkarrekin gobernatuko dutela jakin da. Urretxun PSE-EE gobernu taldean sartu da eta Zumarragan EAJ izan da gobernu taldean sartu dena. Zumarragan Josu Idigoras (EAJ) Euskara eta Hezkuntza batzordeburu izendatu dute eta Urretxun Alex Gonzalez (PSE-EE) izendatu dute Euskara eta Hezkuntza batzordeburu. Bi alderdiek prentsa ohar bat igorri dute, erabakiaren berri emanez. Bertan, koalizio gobernua osatzearen helburua bi udalen egonkortasuna lortzea dela diote. “Era berean, bi alderdiek Urretxun, Zumarragan eta Legazpin dituzten tokiko zuzendaritzek adostu dute akordio hori Urola Garaiko Mankomunitatera eta Garapen Agentziako (UGGASA) Administrazio Kontseilura zabaltzea. Bi alderdiak jakitun dira udalerriek eta Urola Garaia eskualdeak oso erronka garrantzitsuei egin behar dietela aurre, eta erronka horretarako gobernu egonkorrak behar dituztela, udalerrietako eta eskualdeko garapen ekonomikoarekin, sozialarekin eta ingurumen garapenarekin konprometituak. Gobernu berri horiek gizarte, ekonomia, etxebizitza eta ingurumen politiketan aurrera egiten jarraitu nahi dute, udalerriak eta eskualdea murgilduta dauden eraldaketarekin jarraitzea ahalbidetuko duten akordioen bidez”.
