Urretxuko gobernu taldeak (EAJ eta PSE-EE) legegintzaldi honetarako plana aurkeztu zuen eta EH Bilduk gobernu taldearen lankidetzarako “borondate falta” salatu zuen. Gobernu taldeak prentsa ohar bat bidali du komunikabideetara, EH Bilduri erantzunez.
Bertan, EH Bilduren salaketa “nahasgarria” dela eta bertan “kontradikzio” asko daudela diote. “Autokritika falta leporatzen digute eta zoritxarrez denbora gutxian behin EH Bilduri gobernuan egon zen garai beltza gogoratu beharra diogu (2007-2015). EH Bilduren egungo bozeramaleak denbora horren erdia gobernuan pasa zuen. Ez daki ezer, ez du ezer gogoratzen, ez zuen azalpenik eman, ez du azalpenik ematen eta ez du azalpenik emango. Ardura beste batzuei leporatzeko bakarrik, agian. Baina han egon zen. Eta utzi zuena utzi zuen. Lau urte behar izan ziren hura konpontzeko. Gure legealdi planean jaso dugun bezala, 2015etik 2019ra Urretxu berreskuratzeko lan egin genuen. Lortu genuen eta harro gaude”.
EAJ eta PSE-EEren arteko akordioaz ere harro daude. “EH Bilduk EAJ eta PSE-EEren arteko akordioaren ondoren sortutako gobernua berria dela dio. Hala da. Horregatik, legealdi plana ere berria da. Partekatua da eta hori bertutea da. Orain arteko egitasmoen jarraipenean eta herritarren ordezkarien arteko errespetuan eta lankidetzan oinarrituta dago. Gutxitan lortu da hori Urretxun. Lortu dugu eta harro gaude”.
Bestalde, udal hauteskundeak EAJk irabazi zituela gogoratu dute. “EH Bilduk azken hiru hauteskundeak irabazi dituztela aipatu du, baina udal hauteskundeetan herritarrek ez zuten beraiengan konfiatu. Herritarrek beraiek ez gobernatzea erabaki zuten. Gobernatzen ari direnek gobernatzea erabaki zuten. EAJ eta PSE-EEren arteko hitzarmenek gauza onak bakarrik ekarriko dituzte. Horregatik sinatu dugu hitzarmena. Fruituak ikusiko ditugu eta harro gaude”.
EAJk azken urteotan egindako lana gogoratu du. “EH Bilduren esanetan, legealdi planaren ardatzek eta neurriek 10 urte baino gehiago daramatzate indarrean. Nola zeuden udal kontuak gobernura iritsi ginenean? Zein zen antolaketa urbanistikoa? Zenbat etxebizitza eraiki ziren ordura arte? Nolakoak ziren etxebizitza horiek? Zein zen Irimo-Sarralde eremuaren egoera? Zer nolako babes ekonomikoa jasotzen zuen eskola publikoak? Ikastola berrituta al zegoen? Aspacek etorkizunean instalazio berriak izango zituenaren susmorik ba al zuen sikira? Adinekoentzako apartamentuak? Kiroldegiko monitoreek erregulartasunez kobratzen al zuten? Urretxu gizarte arloko inbertsioetan liderra al zen? Inbertsio estrategikoak egiteko asmorik al zegoen? Gauzak hobeto egin daitezke, noski, eta oraindik asko dago egiteko. Horregatik onartu dugu legealdi plana. Baina herritarrek argi eduki dezatela gure eredua eta EH Bildurena erabat ezberdinak direla”.
EH Bilduren proposamenik ez dutela jaso diote. “EH Bilduk bere proposamenen %90 baztertzen dugula dio. Orain arte ez dugu tokiko zaintza ekosistemaren inguruko proposamenik jaso (udalak esku artean duen egitasmo garrantzitsuena da), ezta gaztedi planaren inguruko proposamenik, ezta euskara planaren inguruko proposamenik, ezta Zumarragarekin ditugun egitasmoen inguruko proposamenik, ezta Pagoeta gune soziokulturalaren erabilerari buruzko ordenantzaren inguruko proposamenik… Hori bai, sarritan proiektuak bere egiten dituela ikusten dugu. Ondo iruditzen zaigu. Baina kudeaketaz hitz egiten dugunean, ez gara ados jartzen. Ez da harritzekoa. Izan ere, esan bezala, gure kudeaketa ereduak elkarren oso ezberdinak dira”.
Bukatzeko, EH Bilduri komunikabideek itsututa bizi dela leporatu diote. “EAJk bederatzi urte baino gehiago daramatza Urretxuko gobernuan. Komunikabideen fokuek EH Bildu itsutuko dute. Egunerako lanean zentratu dadila. Prozesu hau luzea izango da eta EH Bilduren parte hartzea beharrezkoa da. Bere neurrian”.
