Gorka Zufiaurre Niño aktore urretxuarrak La que se avecina telesail arrakastatsuan parte hartu du. Datorren astelehenetik aurrera ikusi ahal izango da, Amazon Prime Videon.
Astelehenetik aurrera ikusi ahal izango den kapitulua uztailaren 31n grabatu zuten, Madrilen. Zufiaurre bere ama Elenarekin eta bere arreba Sararekin joan zen bertara. Urretxuarrak eszena batean parte hartu zuen, Pablo Chiapella aktorearekin. Chiapellaren pertsonaiak (Amador Rivas) enpresa bat sortu du eta Zufiaurre lan bila joango zaio. Urretxuko aktoreak eta bere amak ikusleek barre asko egingo dutela aurreratu dute.
Amak telesaileko kide guztien jarrera goraipatu du. «Guztiak oso ondo portatu ziren. Batez ere, Pablo. Macarena Gomez (Lola Trujillo), Nacho Guerreros (Coque), Jordi Sanchez (Antonio Recio) eta Fernando Tejero (Fermin Trujillo) aktoreekin ere izan ginen. Zuzendariak eta agentziak Gorkaren lana txalotu zuten».
Oso esperientzia polita izan zen. «Gorkak La que se avecina telesaila ikusten du eta aktore guztien izenak dakizki. Guztiekin oso ondo konpondu zen. Ea bere lana ikusleen gustukoa den eta kapitulu gehiagotan lan egiteko deitzen dioten…».
Zufiaurrek 30 urte baino gehiago daramatza aktore lanetan. 14 urterekin hasi zen, Aitor Mantxolaren Aquel mundo de Jon film laburrean. Antzeztea asko gustatu zitzaion eta ordutik egitasmo askotan parte hartu du.
‘Bernar’ eta ‘Etzi’
Bere lan kuttunen artean Bernar film laburra dago: John Anduezak zuzendu zuen, Down sindromea duen bere arrebaren omenez. Legorretako Zinkunegi anaien Etzi lana ere oso garrantzitsua izan zen berarentzat. Izan ere, pertsonaia nagusiaren rola egin zuen eta Euskal Herriko antzoki askotan antzeztu zuen.
Telebistan ere lan egin du. Goenkale, Gure familia eta beste pizti batzuk eta La valla (Atresmedia) telesailean, hain zuzen ere. Zineari dagokionez, Fuego, El hoyo 1 eta El hoyo 2 pelikuletan lan egin du. Aktore ezagun askorekin lan egin du: Jose Ramon Soroiz, Aizpea Goenaga, Ramon Agirre, Kontxu Odriozola, Itziar Ituño, Klara Badiola, Teresa Calo, Jose Coronado, Leire Berrocal…
Antzeztea funtsezkoa da berarentzat. «Bizipoza ematen dit eta oso lagungarria zait. Antzerkia egiteak jende aurrean egoten irakatsi dit», dio Urretxuko aktoreak. Antzezlan, telesail eta pelikuletan parte hartzeaz gain, Urretxuko Galdeano patata biltegian lan egiten du. 16 bat urte daramatza bertan. «Nagusiak aktore lana egitea errazten dio», aipatu du bere amak.
Denbora librean musika entzutea eta Play Station-ean jokatzea gustatzen zaio. Hercules da bere joko kuttuna. Kirola egitea ere gustuko du. Mantenu gimnasia egiten du.
