Euskal Herriko beste ikastetxe batzuetako ikasleekin batera prestatutako antzezlana Barakaldo, Donostia, Gasteiz eta Gernikan antzeztuko dute
Joxe Mari Iparragirre BHI institutuko DBH 4.mailako ikasleak Gerrako umeak proiektuan parte hartzen ari dira. Proiektu horren helburua 1936ko gerraren eta, orokorrean, gerren ondorioak haurren bizipenetatik ezagutzea, memoria historikoa lantzea eta enpatia, giza eskubideak eta bakearen balioak sustatzea da. Horretarako, antzerkigintza erabili dute tresna nagusi gisa, gerra garaiko hainbat umeren testigantzak irudikatu eta adierazteko.
Euskal Herriko ikastetxe desberdinek hartu dute parte proiektu horretan, ekimenari izaera parte hartzailea emanez: Iurretako Juan Orobiogoitia, Duranako Ikasbidea, Durangoko Fray Juan de Zumarraga eta Bilboko Ibarrekolanda. Ikasleak talde lanean aritu dira, testigantzak ezagutu dituzte, hauek interpretatuz eta eszenaratuz. Bide horretan landu dituzte bai adierazpen artistikoa baita hausnarketa kritikoa ere.
Prozesuan zehar, hainbat baliabide sortu dituzte ikasleek, ikasturte bukaeran ikusgai jarriko direnak. Aldi berean, ikasle talde batek, bolondres aurkeztuak, egindako lanaren ondorio izan den ikuskizunean hartuko dute parte, proiektuan parte hartu duten ikastetxe guztien artean ondua. Proiektuan landutako edukiak taularatzeko unea izango da hori. Gerra garaiko haurren testigantzak antzerkiratzeaz arduratuko dira Iparragirreko gazteak. Emanaldi hauek aukera paregabea izango dira ikasleen lanaren emaitza ezagutzeko eta proiektuaren zentzua herritar, familia eta ikaskideekin partekatzeko. Gidoia Joseba Sarrionandiak egin du.
Intxorta Elkarteak sustatutako ekimena da honakoa, 2025-2026 ikasturtean zehar garatu dena. Hilabeteak daramatzate gazte hauek, antzerki munduan adituak diren Oier Agirre eta Nerea Lizarralderekin prestaketa lanetan eta, emanaldiak gerturatu ahala, entsegu kopurua areagotu dute. Barakaldoko Clara Campoamor antzokian egingo dute estreinekoz, apirilaren 24an (ostirala), 19:00etan. Horren ondotik, emanaldia Donostia, Gasteiz eta Gernikara eramango dute. Lau emankizun izango dira denera:
-
– Apirilak 24 ostirala, Barakaldon, Clara Campoamor antzokian 19:00etan.
-
– Maiatzak 8 ostirala, Donostian, Antzoki Zaharrean 19:30ean.
-
– Maiatzak 15 ostirala, Gasteizen, Salburua Aretoan 19:00etan.
-
– Maiatzak 22 ostirala, Gernikan, Lizeo antzokian 19:00etan.
Ikuskizunera gerturatu nahi duenak antzoki horietako bakoitzaren webgunearen bitartez eskuratu beharko ditu sarrerak.
Honakoak dira antzerki saio horietan parte hartuko duten Joxe Mari Iparragirre institutuko ikasleak: June Peña, Miren Lopez, Vika Lesmes, Maddi Ramirez, Doua Lahrach, Kattin Oiartzabal, Naiara Mora, Josep Obando, Maialen Segurola, Maialen Arrizabalaga, Irati Mendiola, Soad Castro, Uxue Marcos, Nerea Callejo, Mariam Hadadi, Sara Haddadi, Nekane Maraña, Irati Tobar eta Maier Iturri.
Honen bitartez, gonbita luzatzen zaie Urretxu eta Zumarragako herritarrei herriko gazteak parte izango dituen ikuskizunera gerturatzeko.
