Ekintzaileentzako Gipuzkoa Ekin sariak banatu dira gaur (astelehena), Gipuzkoako berrikuntza eta industria ekintzailetza alorrak antolatuta, Miramongo Teknologia Parkeko BIC Gipuzkoaren instalazioetan. Lanbide Heziketako ikasgeletatik sortutako proposamen teknologiko aipagarrienak saritu ditu eta sarituetako bat Garikoitz Agirrezabal urretxuarra izan da, Kiski Pilotak egitasmoarekin. Agirrezabalek eskuz jokatzeko pilotak egiteko makina garatu du.
Agirrezabalek 30 urte ditu eta Lanbide Heziketako industria gaitasuna eta kirolzaletasuna uztartzen ditu. Pilotan jokatu zuen, 15 urte daramatza pilotak eskuz egiten eta 7 urte daramatza epaile lanean. Automatizazio eta Robotika Industrialeko Goi Mailako Teknikaria ere bada. Pilotaren sektorean dagoen arazo kritiko bat identifikatu du: belaunaldi aldaketak dakarren pertsonal falta eta eskuzko prozesu tradizionalaren muga fisikoek eragindako material eskasia.
Kiski Pilotak proiektua artisautza teknifikatu proposamenari esker saritu dute, beste hamalau proiekturekin batera. UGLE eskola proiektuko bazkide teknologikoa da. Lanaren mamia makina hibrido baten diseinua eta garapena da. Makina hau pilotak egiteko faserik konplikatuenak automatizatzeko gai da (adibidez, artilearen biltzea), material nobleak (artilea, latexa eta larrua) erabiltzeari utzi gabe. “Ez gara artisautza tradizionalarekin modu suntsitzailean lehiatzeko jaio, baizik eta hori modernizatzeko, babesteko eta azken maisu pilotagileen erretiro hurbilak utziko duen merkatuko hutsunea betetzeko”, azpimarratu du bere memoria teknikoan.
Ingeniaritza mekatronikoa kirol tradizional horretan sartzeak errendimendu disruptiboa dakar: garatutako makineria eskuzko metodoa baino 15 aldiz azkarragoa da. Hau da, ekoizpen gaitasuna %1.400 handitzea dakar. Horrek, klub eta federazioentzako loteen estandarizazio erabatekoa bermatzeaz gain, lan osasunean ere berrikuntza handia dakar, eskuzko iruteak langileen eskuetan eragiten dituen lesio kronikoak saihesten baititu.
Kiski Pilotak proiektuak lortutako sariak BIC Gipuzkoak emandako 1.000 euroko dirulaguntza dakar. Dena den, sariaren benetako balioa arlo estrategikoan dago: Kiski Pilotak proiektuak 6 hilabeteko laguntza eta mentorizazioa izango du, BIC Gipuzkoako teknikari espezializatuek eta UPTEK klusterrak elkarlanean koordinatuta.
Tknikak (Euskadiko Lanbide Heziketako Ikerketa Aplikatuko Zentroa) eta Eusko Jaurlaritzako Hezkuntza Sailak sustatutako lehiaketa honek helburu nagusi bat du: osagai teknologiko aurreratua, berrikuntzarako potentziala eta egungo merkatuan aplikazio erreal bat duten proiektuak bultzatzea.
