Gipuzkoako Azoken Sareko lan taldeak, Zumarragako udalarekin elkarlanean, Azokatik Mahaira: sukaldean behin ikastaroa antolatu du. Bihar, 11:00etan azokan bertan, herritarrei eguneroko elikadura modu erraz, osasungarri eta iraunkorrean antolatzeko tresnak eskainiko dizkiete.
Proposamenaren ardatza argia da: egun bakarrean, bi ordutan, aste osorako janaria prestatzea. Parte hartzaileek sukaldean denbora optimizatzen ikasiko dute, aldi berean dieta orekatu eta osasungarria bermatuz. Horretarako, bertako eta garaiko produktuak erabiliko dira. Horrela, tokiko ekoizleen lana balioan jarriko dute eta kontsumo arduratsua sustatu.
Saioa Anne Otegi sukaldariak eta Aitziber Aizpuru nutrizionistak gidatuko dute. Haien eskutik, parte hartzaileek aholku praktikoak eta egunerokoan aplikatzeko moduko errezetak jasoko dituzte.
Ikastaroan parte hartzeko ez da izen eman beharrik izango, bertaratzearekin nahikoa izango da. Amaieran, egun horretan sukaldatutako platera dastatzeko aukera egongo da. Gainera, saioan egingo diren errezetak eta nutrizio aholkuak banatuko dira.
