"Bagenekien igotzea oso garrantzitsua dela, baina lortu arte ez dugu ikusi egindakoaren ondorioa: zer nolako oihartzuna duen, jendeak nola bizi duen..."
Jokin Gabilondo futbolari urretxuarra Lehen Mailara igo da, Malaga taldearekin, larunbatean Almeriari 1 eta 2 irabazi ondoren. Gabilondo pozez zoratzen dago, noski. Astelehen arratsalden zaleekin ospatu zuten, Malagako kaleetan. 200.000 lagun inguru atera ziren kalera. «Guretzako oso partida garrantzitsua zen. Bagenekin zer zegoen jokoan, baina denboraldia nola joan den ikusita, guregan sekulako konfiantza genuen. Izan ere, oso bolada onean geunden. 1. RFEFtik Bigarren Mailara igo ginenean urduriago geunden. Larunbatekoa oso egun polita izan zen: gugan sinisten genuen eta helburua lortu genuen. Bagenekien igotzea oso garrantzitsua dela, baina lortu arte ez dugu ikusi egindakoaren ondorioa: zer nolako oihartzuna duen, jendeak nola bizi duen…», esan du Gabilondok.
Merezi bezala ospatzen ari dira, noski. «Partida amaitu zenean, gure zaleengana joan ginen. Oso polita izan zen, denboraldia oso luzea izan baita. Baina egindako esfortzuak merezi izan du. Nire neska zaleen artean zegoen. Gurasoek ez zuten etortzerik izan eta Urretxun ikusi zuten, familiakoekin. Gu baino urduriago zeuden. Lagunek Laket tabernan ikusi zuten».
Hiru urtetan, 1. RFEFtik Lehen Mailara igo dira. «Ez genuen espero horren azkar igotzea. Malagara etorri ginenok bagenekien ardura handia genuela, helburua Lehen Mailara igotzea baitzen. Bigarren Mailara igotzea obligazioa zen eta berehala lortu genuen. Baina presio handia genuen. Beste hau, ordea, sari handi bat da. Ez gara lortutakoaren garrantziaz jabetzen oraindik, baina denborarekin balioa emango diogu».
Denboraldi honetan aurrekoetan baino gutxiago jokatu du. «Lehen bi denboraldietan gehiago jokatu nuen. Azken denboraldi honetan ez dut horrenbeste jokatu. Baina futbola taldeko kirola da eta oso pozik nago lortutako emaitzarekin». Kontratua ekainaren 30ean amaitzen zaio. «Oraindik ez dut asko pentsatu etorkizunean. Igoera besterik ez genuen buruan eta hurrengo egunetan zehaztuko da nire etorkizuna. Malagarekin Lehen Mailan jokatzeak ilusio handia egiten dit, baina Malaga utzi beharra badut ere, pozik egongo naiz: dena eman dudalako eta helburua lortu dugulako. Ez dago aro bat amaitzeko modu hoberik».
Malagan gustura dago. «Neska-lagunarekin etorri nintzen. Gure lehen esperientzia zen etxetik kanpo. Asko ikasi dugu. Etxetik urrundu arte ez zara konturatzen horrek zer lan dakarren, baina bizitzea hori da». Aurki oporrez gozatuko dute. «Erlaxatzeko gogoa dugu. Taldekideak Ibizara joan behar dira, baina gu Urretxura joango gara. Urte osoa familiarengandik urrun eman dugu eta senitartekoak eta lagunak ikusteko gogo handia dugu».
