Santa Isabel da gaur, Zumarragako egun handia. Ohiko ezpata-dantza egin dute elizan, eta erromeriak iluntzera arte jarraituko du.
Zumarragarren egun handia da gaur, Santa Isabel, eta topagunea Antioko baselizaren inguruan dute goizetik. Ohiko ezpata-dantzak, prozesioak eta mezak ehunka lagun elkartu ditu 11:00etan, eta are gehiago bildu ditu ondoren, elizaren inguruan ospatzen ari den erromeriaren aitzakian.
Festa girorik ez da falta paraje horretan, eta ez da faltako iluntzera arte, inguruko zelaietan eta zuhaiztietan jarritako dozenaka mahaietan. Antion bazkaltzeko eguna da gaur, eta zumarragarrek tinko eusten diote ohitura horri, eguraldi ona ala txarra egin. Gaurkoa bazkarirako eta festarako ona dela esan dute, aterperik ez delako behar ez euritik babesteko ezta eguzki berotik ihes egiteko ere. Iluntzera arte iraungo du horrela, beraz, festarekin jarraitzeko, bikain. Herrirako jaitsiera ere eramangarriago egingo du, gainera.
Gaurko protagonistak
Gaur zumarragar guztiak dira protagonistak, baina batzuk beste batzuk baino gehiago, eta horien artean daude dantzariak eta txistulariak.
Ezpata-dantza egin duten dantzariak Irrintzi dantza taldekoak dira, eta urteko hitzordurik garrantzitsuena bizi dute goizean eliza barruan, Antioko Andra Mari amabirjinari eskainitako dantzarekin. Gaurko ezpata-dantzan, Adur Garmendia, Nahia Zubia, Nahia Alustiza eta Malen Larrañaga izan dira kapitainak, eta sokan aritu dira Elena Urteaga, Miren Hernandez, Eneritz Mendia, Jon Calzada. .Sara Aztiria, Izaro Baztarrika, Intza Larrañaga, Itxaso Zurutuza, Saioa Telleria eta Irati Marin.
Antxinako Ama txistularientzat ere egun handia da gaurkoa. Oier Zabaletak, Gorka Janeirok, Lierni Goiak, Maialen Zubizarretak, Mikel Urteagak, Iñaki Urteagak, Maria Jesus Arratibelek, Aitor Zabaletak eta Xabier Soraluzek osatu dute gaurko banda.
Bestelako protagonista bat ere izan da gaur Antioko baselizan, Peter Chiopsa apaiza. Urte askoan Euskal Herrian lan egin ondoren, Malawi jaioterrira itzultzekoa da laster, eta agur gisa, gaurko mezan apaiz nagusia izan da. Mezan zehar, gainera, Nerea Elustondo eta Aitor Mendiluze bertsolariek agur bertsoak abestu dizkiote.
