Urretxuarrek Santa Anastasia jaiak ospatu dituzte, ostiralean hasi eta astelehenera arte. Eguraldia lagun, aurtengo festak bikainak izan dira.
Lau egun parrandan jo eta ke eman ondoren, urretxuarrek atzo eman zituzten amaitutzat aurtengo Santa Anastasia jaiak. Giroa bikaina izan da. Borobila. Ostiralean utzi gintuen Olentzero txistulariaren txapela bezain borobila. Ziur berak ere jaiak gozatu dituela, dagoen tokitik.
Jaietako lehen eguna triste esnatu zen, Iñaki Kerejetaren heriotzarekin. Kerejeta Urretxuko Lizarriturri txistulari taldeko kidea zen eta herriko beste hamaika ekimenetan ere parte hartu zuen. Beti laguntzeko prest, herriko Olentzero, Irrintzi taldeko txistularia eta Elikagaien Bankuko kidea izan zen. Realzale eta pilotazale sutsua ere bazen.
Eta festazalea, noski. Hala, 2026ko festak Atxunberri gogoan ospatu dira. Ostiral eguerdian Jesus Mujika txirrindulari urretxuarrari buruzko liburua aurkeztu zuten. Arratsaldean, haurrentzako eta gazteentzako ekitaldiak eta musika izan ziren nagusi. Atsolorra egin zuten, lehen aldiz: iaz jaiotako haurrei ongi etorria egin zieten. Beraiek izan ziren jaietako zapia janzten lehenak.
Iluntzean pregoia eta txupinazoa izan ziren. Jubilatu berri diren eta jubilatzear diren udal langileek eman zioten hasiera Urretxuko jaiei: Miren Castillok, Aitor Mendiarazek eta Juanjo Sagastibeltzak (Patxi Lazkano ere parte hartzekoa zen, baina ezin izan zuen). Castillok irakurri zuen pregoia, lauen izenean. Gauzak aldatzen ari direla eta, Urretxuk berezkoa duen herri izaera zaintzera deitu zituen urretxuarrak. «Plazer handia izan da urte hauetan guztietan zuekin elkarlanean aritzea. Ondo eginak gogoan hartu eta hankasartzeak barkatu», esan zuen. Gauean musika izan zen nagusi, kalean eta txosnetan. Larunbat goizeko ekitaldi nagusia Urretxuko baserrietako ganadu erakusketa izan zen. Trikitilariek eta bertsolariek girotu zuten. Horretaz gain, Kresala taldeak dantza ikuskizuna egin zuen. Jende asko elkartu zen Areizaga-Kalebarren plazan.
Arratsaldean xake txapelketa, idi probako bigarren saioa eta gastronomia lehiaketa jokatu ziren. Xake txapelketa Bilboko Conteneo klubeko Juan Manuel Ruizek irabazi zuen. Bigarren postuan Elgoibarko Zubiondo klubeko Markel Kerexeta sailkatu zen eta hirugarrenean Beasaingo Alfil taldeko Sergio Bellosillo. Herriko onena Legazpiko Santikutz klubarekin jokatzen duen Unai Elias izan zen.
Gaztetxoei dagokienez, 15 urte azpikoen mailan Abadiñoko taldeko Mohamed Ademi nagusitu zen. Bigarren Azkoitiko Anaitasuna Kakute taldeko Luken Pascual izan zen eta hirugarren Galdakao taldeko Kimetz Benito. Amaieran urdaiazpiko bat zozkatu zuten. Goierri taldeko Ketxus Amenabarrek irabazi zuen.
Idi probari dagokionez, Asier Izagirre Ipiñarrietaren idiak nagusitu ziren, 43 plaza, zinta bat eta 0,35 metrorekin. Bigarren postuan Ander Aizpuru Olalderenak sailkatu ziren (40 plaza eta 2,95 metro), hirugarrenean Iker Zubillaga Igeldorenak (35 plaza eta 3,14 metro) eta laugarrenean Iñaki Irigorasenak (31 plaza). Debekua zela eta, Zumarragako jaietako proba ezin izan zen jokatu. Santa Isabel jaietan jokatu behar zena Buzkantza Egunean jokatuko da. Buzkantza Egunean ere larunbateko lauek neurtuko dituzte indarrak. Bi egunetako markak batuko dira eta hiru onenak Santa Lutzi eguneko finalera pasako dira.
Sukaldaritza
Gastronomia lehiaketa, urteroko moduan, oso arrakastatsua izan zen. Legatz solomoa prestatu zuten, hirugiharrez eta otarrainxkaz betea, arrautzaztua eta saltsa holandarrean estalia. Plater onenari saria Inspector Chinchilla kuadrillak irabazi zuen (Oskar Zufiaurre eta Pedro Lopez izan ziren sukaldariak) eta aurkezpen onenari dagokiona Haize Berri kuadrillak (Jose Carlos Ibarzabal eta Jose Manuel Barriga izan ziren sukaldariak).
Larunbat arratsaldeko ekitaldi hunkigarriena txistularien alardea izan zen. Iñaki Kerejetari eskaini zioten, noski. Alardearen aurretik hileta elizkizuna izan zen eta amaieran txistulariek Agur jaunak jo zuten. Alardearen hasieran, berriz, Iñakiren txistua, danborra eta Olentzero jantzia jarri zituzten eszenatokian eta txistulariek loreak eskaini zizkioten. Gauean kontzertu jendetsuak izan ziren Gernikako Arbola plazan eta txosnetan.
Euskal Jaia
Igandean Euskal Jaia ospatu zuten. Ekitaldi nagusia, urteroko moduan, ibilaldia izan zen. Karroza lehiaketa LKPT kuadrillak irabazi zuen. Haur eta gurasoez osatutako kuadrilla horrek haurtzaroa zaintzearen garrantzia aldarrikatu zuen. Epaimahaiak karrozaren bukaera maila eta gaia azpimarratu zituen. Baita transmisioa bermatzeko egin zuten lana ere. Ikusleen saria 2001 kuadrillak irabazi zuen, Karrozen desfilea auzitan lanarekin. Konpromisoari buruzko lan horrek botoen %27,9 eskuratu zuen. 628 bozka guztira.
Sari banaketaren ondoren herri bazkaria egin zuten eta festa astelehen goizaldera arte luzatu zuten, musikarien laguntzarekin. Atzo, zezentxoak eta musika ekitaldiak izan ziren nagusi. Jaiak kantu afariarekin amaitu ziren. Txistua jotzen duen herria ez da inoiz hilko!
