Ostegun arratsaldean bisita gidatua egingo dute
Donostiako Parke Teknologikoan dagoen CIC biomaGUNE biomaterialen ikerketa zentroak Zientzia femeninoan: begi hutsez ikusten ez dena erakusketa ireki du Zumarragako kultur etxean. Erakusketaren helburua zientzia gizarteari hurbiltzea da, mikroskopia tekniken bidez lortutako irudi zientifikoen eskutik. Irudiak ikerketa zientifikoan aritzen diren emakumeek eginak dira. Guztiek CIC biomaGUNEn lan egiten dute edo lan egin dute. Bihar (osteguna), 18:00etan, Irantzu Llarena eta Lydia Martinez CIC biomaGUNEko zientzialarien bisita gidatua eskainiko dute. Argazkiak eta haiekin lotutako ikerketa modu dibulgatzailean eta denek ulertzeko moduan azalduko dituzte. Erakusketa ostiralean itxiko dute.
Clara Garcia Gorro CIC biomaGUNEko komunikazio zientifikoko arduradunak Zelai Arizti kultur etxeko erakusketaren garrantzia azpimarratu du. «Ikerketa zientifikoaren aztergai askorekin gertatzen den bezala, emakume zientzialarien lana ez da beti ikusten eta, beraz, ezinbestekoa da haien lanari aintzatespena eta agerikotasuna emango dioten espazioak sortzea».
Erakusketarekin Zientzia hurbila eta pentsamendu kritikoa landa ingurunean dibulgazio zientifikoko proiektuari hasiera emango zaio. Zenbait jarduera egingo dira, urritik apirilera bitartean. Proiektuak Zientzia eta Teknologiaren Espainiako Fundazioaren (FECYT) eta Eusko Jaurlaritzako Zientzia, Unibertsitate eta Berrikuntza Sailaren finantzaketa du. Baita Zumarragako Udalaren lankidetza ere. Ikastetxeetan hitzaldi interaktiboak egingo dira eta kultura zientifikoari eta alfabetatze mediatikoari buruzko belaunaldien arteko ikastaro bat ere antolatu da. Horrez gain, ikuskizuna, dantza, dibulgazio zientifikoa eta testigantza pertsonala uztartzen dituen Ciencia contra la Tormenta ikuskizuna egingo da 2027ko apirilaren 10ean, Zientziaren eta Teknologiaren Munduko Eguna dela eta.
Helburuak
Zientzia gizarteratu nahi dute. «Proiektu honen helburuak askotarikoak dira: zientzia gure kulturaren zati gisa erakustea, mundu guztiak goza dezakeen zerbait bezala; pentsamendu kritikoa sustatzea desinformazioari aurre egiten laguntzeko; eta gazteek zientzia aukera profesional gisa ez hartzea eragin dezaketen estereotipoak desmuntatzea», azaldu du Garcia Gorrok.
Zientziarekin lotutako ekitaldi gehienak hiriburuetan antolatzen dira, baina oraingoan Urretxura eta Zumarragara helduko dira. «CIC biomaGUNEn kultura zientifikoa sustatu nahi dugu eta uste dugu garrantzitsua dela herrietara ere iristea. Beraz, ilusio berezia egiten digu proiektu hau finantzaketa publikoari esker gauzatu ahal izatea», azaldu du Aitziber L. Kortajarena CIC biomaGUNEko zuzendari zientifikoak.
Mikel Serrano, Zumarragako alkatea, pozik agertu da. «Garrantzi handikotzat jotzen dugu ezagutza zientifikoa Zumarragako herritarrengana hurbilduko duten ekimenak sustatzea, hezkuntza, berrikuntza eta pentsamendu kritikoa hauspotzeko eta belaunaldien arteko elkarrizketa bultzatzeko. Ziur gaude ekimen honek gure udalerriko kultura, hezkuntza eta gizartea garatzen lagunduko duela, eta herritar guztiak gonbidatzen ditugu ekitaldiez gozatzera».
