Hilabete barru junior mailako Estatuko taldeak Argixaon aurrez aurre
Urola K.E.ko beisbol sailak, Estatuko junior mailako txapelketa antolatuko du datorren hilean. Txapelketa Santa Isabel jaietako egitarauaren barnean egongo da eta bertan, Estatuko talderik onenak ikusteko aukera izango dugu. Besteak beste, Zaragoza, Bartzelona, Iru?ea, Burlata eta Donostiako punta puntako taldeak lehiatuko dira elkarren aurka.
Iaz, Bartzelonan egin zen txapelketa eta aurten, txapelketa antolatze hutsagatik 250.000 pezeta ordaindu beharko du Zumarragako taldeak.
Urola K.E.ko Beisbol taldea
- Taldeak 1991 urtean eman zituen bere lehen urratsak eta orduan gazte ugarik azaldu zuen bertan jokatzeko gogoa.
- Bi herriotan kirol hau oso ezaguna ez den arren, neska talde batek eta mutil talde batek osatzen dute Urola K.E.ko beisbol saila.
- Neskak, Gipuzkoako ligan eta Euskadiko Lehen mailan ari dira. Beisbolean jokatu ordez, sofbolean dihardute. Sotbola emakumeei egokitutako beisbola da eta beisbolarekin konparatuz pilotaren tamainan eta jaurtitzeko moduan ezberdintzen da.
- Herritarrekin batera Lazkaoko bi neska dabiltza taldean eta aipatzekoa da gainera, hiru jokalari Euskadiko Selekzioan jokatzen ibiliak direla.
- Mutilak Euskadi mailako kadete ligan ari dira.
- Bi taldeek Argixaon edo anexoan jokatzen dute eta kirol honenganako ardura urriaz kezkaturik agertzen dira batik bat futbolaren nagusitasunaren aurrean. Beisbola praktikatzeko behar den materiala garestia da, horregatik Urretxu eta Zumarragako udalen laguntzak eta HD tabernaren babesa jasotzen dute.
- Partidak 7 sarreretara jokatzen dira eta 9 jokalarik hartzen dute parte. Ez da praktikatzeko kirol gogorra, astean 4 orduz entrenatzen dute guztira. Entrenamenduetan batez ere teknika lantzen dute.
- Taldeak jokalariak behar ditu eta interesatuta egonez gero, Urola Kirol Elkarteak Jai Alai kalean duen egoitzara jo daiteke informazio bila.
