Orain, udaberria heldu da eta, zuhaitzak bezala, Kilometroak 2002ko lantaldeak ere euren fruituak ematen hasi dira. Arropa dendan, adibidez, udaberri eta uda denboraldiko arropa aurki dezakegu jada. Arropa salmenta batzordeko kideek Kilometroak 2002ko jantziak hastear dauden Euskal Herriko herrietako festa ezberdinetan ere salgai jarriko dituzte. Horrez gain, Urbil eta Garberako Eroski dendetan ere aurki ditzakegu.
Bestalde, Kilometroak festaren inguruan, urtero, hainbat kultur ekitaldi ere izaten dira eta, aurten ere hala izango da. Hilaren 30ean Txan Magoa izango da Zumarragako Zelai-Arizti antzokian. Sarrerak Legazpi kaleko Kilometroak 2002 dendan eskura daitezke, 4 eurotan, hilaren 25etik 29ra.
Maiatzaren 11n, gaztedia batzordeak antolatutako bi ekitaldi egongo dira. Arratsaldeko 6etan, Kalebarren-Areizaga plazan, bertso-eskolakoek bertso trama berria aurkeztuko dute. 7etatik 8etara, berriz, Txotx Festa izango da. Egun berean, arratsaldeko 6:30ean Ederrena pilotalekuan, Gastronomia Lehiaketa izango da. Parte hartzaileek (Ikastolako gurasoak, bi herrietako koadrilak eta elkarteetako kideak) zurrukutuna prestatuko dute. Gaueko 9etan sari banaketa izango da eta, ondoren, prestatutakoa afalduko dute. Afalostean Trikizio taldearen saioa izango da.
Ekainaren 7an, berriz, Eskolarteko Bertso Txapelketaren finala izango da Beloki pilotalekuan. Ekitaldi hau, normalean, Kilometroak antolatzen duen herrian ospatzen denez, aurten Urretxu-Zumarragan izango dugu.
Ez da hau, Kilometroak 2002ko ekitaldien barne, ekainean izango dugun ekitaldi bakarra. Ekainaren 8an umeen eguna izango da. Bestalde, kultura batzordea, herriko musikari askoren partaidetza izango duen kantu emanaldi bat ere prestatzen ari da. Emanaldi hau, segur aski, ekainaren 15ean izango da gaueko 10:30ean Ederrena pilotalekuan.
Gaztedi eta kultura batzordeek urriaren 6a bitartean beste ekitaldi batzuk prestatzeko asmoa ere badute, baina, hauen berri zehatzagoa beranduago emango dizuegu.
Aurki Kilometroak 2002ri buruzko informazio zabalagoa eta zehatzagoa jasoko duzue. Izan ere, Ikastola Kilometroak 2002ri buruzko aldizkari mardula prestatzen ari da eta Ezkio-Itsaso, Legazpi, Urretxu eta Zumarragako etxe guztietan doan banatuko da maiatza hasieran. Aldizkari honek, Ikastolaren historiaren, Kilometroak 85en, antolaketan dabiltzan batzordeen eta euren lanaren… berri emango dizue.
