Josu Perez urretxuarrak bere herriko ‘Nazionaletan’ egin zituen oinarrizko ikasketak eta gero La Salle Legazpi ikastetxean mekanika ikasketak egin zituen.
Krisi garaia zen eta hamaika lanetan aritu zen. Ondoren, Sarralden 13 urte eman zituen. Orain Beasaingo CAF enpresan lan egiten du. Sei urte daramatza bertan dagoeneko. Josuk mendia, bidaiak eta argazkigintza oso gustuko ditu. Makina bat argazki lehiaketa irabazi ditu. Joan zen ostiralean Santa Lutzi eguneko rallyko lehen saria jaso zuen Labeaga aretoan.
Zer izan nahi zenuen umetan?
Pilotaria. Kirola asko gustatzen zitzaidan, baina azkar konturatu nintzen ez nuela horretan etorkizunik.
Aisialdian zer egitea atsegin duzu?
Kirola egitea eta lagunekin egotea.
Bizitzeko toki bat?
Urretxu bistatik kendu gabe, kostaldea asko gustatzen zait. Zumaia, batez ere: behar den guztia du.
Ezagutu duzun parajerik ederrena?
Islandia eta Noruegia. Sekulako paisaia dute, argazkiak ateratzeko bikaina.
Zein da zure ametsetako bidaia?
Bidaia asko egingo nituzke: Australia, Patagonia…
Eta zure ametsetako mendia?
Annapurnako trekkinga egin nahiko nuke. Baita Peruko Cordillera Blanca delakora joan ere.
Ilehoriak ala beltzaranak?
Berdin dit. Ez naiz ilean fijatzen.
Egindako azken oparia?
Olentzerok ipuinak eta puzzleak ekarri zizkien nire ilobei nik eskatuta.
Eta jasotakoa?
Arreba batek txanoa eta bufanda oparitu dizkit eta besteak Euskal Jairako alkandora.
Data bat?
Nire urtebetetze eguna: apirilak 29.
Neska eta mutil izen bana?
Ez dut bata bestea baino nahiago. Ez diet izenei garrantzia ematen. Jendea ezagutzen duzunean, gutxienekoa da.
Zein egunkari irakurtzen duzu?
Gara erosi eta irakurtzen dut. Hortik zehar topatzen ditudanak ere begiratzen ditut: DV, Noticias…
Gustuko telebista saioa?
Denbora-pasa gisa erabiltzen dut. Aída, Pasapalabra, kirol saio batzuk… ikusten ditut.
Bereziki gorroto duzuna?
Saio batzuekin ez dut segundo bakar bat ere galtzen. Pásalo gorroto dut, batez ere hemengo egoera politikoaz hitz egiten dutenean. Informazio interesatua hedatzen dute.
Pelikula bat?
Malas temporadas. Zineklubean ikusi nuen eta asko gustatu zitzaidan. Billy Elliot ere bai.
Liburu bat?
Bi esango ditut. Bata euskaraz idatzitakoa eta bestea gazteleraz. Laura Mintegiren Sisifo maiteminez eta Gabriel García Márquez idazlearen El amor en los tiempos del cólera.
Soinu bat?
Itsasoarena.
Usain bat?
Kafe egin berriarena.
Janari bat?
Ia dena jaten dut, baina arraina dezente gustatzen zait.
Ura ala…
Sagardoa.
