Antioko interpretazio zentroa, Zumarragako Udalak legegintzaldi honetarako duen proiektu garrantzitsuena da. Horregatik, garrantzitsua da proiektua babestuko duten eragileak inguratzea. Hori zen atzoko bisitaren helburu nagusiena.
Rafaela Romero, Batzar Nagusietako lehendakariak Urola Garaia bisitatu zuen atzo Gipuzkoa ezagutzeko programaren barruan. Eguerdian iritsi ziren Zumarragara Romero eta mahaikideak. Bertan Mikel Serrano, Zumarragako alkateak egin zien harrera. Serranorekin batera, alderdi sozialistako zinegotzi gehientsuenak ziren udaletxean, baita EAJko Juanjo Sagarna eta Valeriano Martinez zinegotziak ere.
Udaletxean, Ventura+Limona arkitekto etxeak proposatutako interpretazio zentroaren maketa ikusi zuten. Romerok, zentroaren %65a lur-azpian eraikitzearen ideia azpimarratu zuen. Ondoren Antiora joan ziren ordezkariak interpretazio zentroa eraikiko den lur-eremua bertatik bertara ikusteko.
Urte amaieran
Mikel Serranok aurreratu zuenez, urte amaiera aldera hasiko dituzte Antion interpretazio zentroa egiteko lanak. Behin hasita, 18 hilabeteko epea izango du enpresa eraikitzaileak lanak amaitzeko. Lan guztien aurrekontua 2,4 milioi eurokoa izango da.
Hasierako proiektutik aldaketak izango dira. Jatetxeak adibidez, 130 pertsonentzako lekua izango du, Ventura+Limonak proposatutakoa baina handixeagoa izango da. Malda batean zorua egokitu eta meriendatzera joateko mahaiak jarri nahi ditu Udalak.
