Geltoki intermodala klima aldaketa saihesteko bide gisa ikusi du Forum Ambiental fundazioak.
Zumarraga Hiri Jasangarria saria jaso du Zumarragak. Sari hauek Forum Ambiental fundazioak eta Smart City Expo World Congress erakundeak ematen dituzte, eta Zumarragari atmosfera ataleko saria eman diote aurten. Zumarragako Udalak geltoki intermodalaren proiektua aurkeztu zuen sarietara. Espainiako Ingurumen Ministerioak babestutako sari hauek jasangarritasunaren aldeko proiektuak burutu dituzten udalerriak nahiz erakunde lokalak saritzen ditu. Mikel Serrano alkateak dagoeneko martxan dauden proiektuak saritzen dituztela nabarmendu du, «dagoeneko jasangarritasuna hobetzen ari direnaren zantzuak erakusten dituzten proiektuei erreparatzen diete»
Eragina kutsaduran
Sariketara aurkeztutako txostenean geltoki intermodalaren eraikuntzak dagoeneko eman dituen emaitzak zerrendatu ditu udalak. Kutsadurari dagokionez, txostenak dioenez, geltoki intermodalari esker CO2aren emisioak gutxitu dira eta PM10 eta PM2,5 partikulak murriztu dira; txostenaren arabera emisio gehienak garraioak eragindakoak direlako. Azken hobekuntza hau, halere, eskualde mailan udalerri mailan baino gehiago nabari dela zehazten du txostenak.
