Urretxuko Udalak Gipuzkoako Foru Aldundiarekin Irimoko parte hartze prozesua eta EUROPAN lehiaketa diru laguntzeko 40.000 euroko lankidetza hitzarmena sinatzea onartu du udalbatzak.
Abenduko osoko bilkura ospatu zen atzo Urretxuko udaletxean. Udalbatzari aurkeztutako puntu guztiak onartu zituzten, gehienak aho batez, eztabaida sortu zuen gairik izan bazen ere.
Aurreko batzarraldietako aktak eta alkatearen ebazpenak onartu ondotik, Urretxuko udalaren eta Gipuzkoako Foru Aldundiaren arteko lankidetza hitzarmen bat onartzeko proposamena aurkeztu zion udal gobernuak udalbatzari. Lankidetza hitzarmen hau ITTEN foru sozietate publikoaren bitartez egitea proposatu zuten, eta oinarrian, Irimoko parte hartze prozesuaren bitartez EUROPAN lehiaketara aurkezteak suposatu dituen gastuei aurre egiteko, 40.000 euroko diru laguntza eskuratzea izan da helburu nagusia.
EUROPAN lehiaketa arkitekto gazteei zuzendutako Europa mailako lehiaketa bat da. Aurkeztutako guztien artean 32 arkitektok aukeratu dute Irimo gunean euren proiektua lantzea eta horietatik 5ek sari garrantzitsuak jaso dituzte.
Hitzarmena aurrera atera zen
Diru-laguntza eskuratzearen truke, Urretxuko Udalak hainbat konpromiso hartu ditu bere gain lankidetza hitzarmen honen bitartez, besteak beste “EUROPAN programaren barne, ideia lehiaketaren oinarriak ezartzeko Irimo eremuaren potentzialtasun eta aukerak zehaztea” eta behin programa amaitu eta gero, “emaitza diren proiektuak Gipuzkoako beste udalerrietan lan eredu aplikatzeko eskuratzea”.
Eztabaida luzea sortu zuen proposamenak alderdi politikoen artean. EAJ ez zen bat etorri Irimoko parte hartze prozesuarekin, eta gune hori soilik erabilera industrialerako utzi behar dela esan zuen, ondorioz kontra bozkatu zuen. PSE-EEk ere aurka bozkatu zuen eta H1!-ek hitzarmeneko zenbait punturekin guztiz ados ez zegoela esan zuen, baina helburua 40.000 euroko diru-laguntza lortzea zela azpimarratu zuen, eta hortaz abstenitu egin zen. Bilduren aldeko 6 bozka, EAJ eta PSE-EEren kontrako 6 bozka eta H1!en abstentzioari esker eta alkatearen kalitatezko botoarekin aurrera atera zen proposamena.
Beste gaiak aho batez
Gainontzeko puntu guztiak aho batez onartu zituzten alderdiek. Eskubide eta betebeharren deuseztapena, udal ondasun eta eskubideen inbentarioari onespena ematea, adinekoen aldeko manifestuari atxikimendua ematea, desjabetzeak direla eta Gipuzkoako Foru Aldundia eta Gipuzkoako Abokatuen Elkargoaren arteko lankidetza hitzarmena eguneratzea, La Salle Legazpi ikastetxean udal ordezkariaren aldaketa eta batzorde informatiboen aldaketa onartzea.
