Biharko Europako Eguna aitzakiatzat hartuta, Elkarrekin Foro Lokala egin dute Urretxun. Ekitaldi hau Aldundiak antolatu du. Europako beste herri batzuekin senidetutako hiru herrik parte hartu dute: Urretxuk, Idiazabalek eta Antzuolak. Urretxu Alemaniako Schwarzenbruck herriarekin anaituta dago eta orain arte kirol eta kultur arloan garatu dute harreman hori. Aurki beste pauso bat emango dute: 70 gazteri hiru urtez Europan lan egin eta ikasteko aukera emango diete. Aldundiak elkarlan eredu hau gainontzeko herri guztietara zabaldu nahi du.
Urretxuko udal ordezkariak Alemanian egon ziren eta Schwarzenbruck-ekoek hango garapen agentziarekin harremanetan jarri zituzten. Bertan, Movipro programaren berri izan zuten. Programa honi esker, Gipuzkoako 70 gaztek Alemanian ikasteko eta lan egiteko aukera izango dute. Hiru urte emango dituzte Alemanian.
DBH titulua duten 18 eta 27 urteko guztiek eman dezakete izena. Hautaketa irailean egingo dute. Ondoren, hautatuek aleman eskolak hartuko dituzte. Maiatzean joango dira Alemaniara. Ostatua doan izango dute. Goizean ikasi egingo dute eta arratsaldean lanera joango dira. 900 euro inguruko soldata jasoko dute.
Aldundiaren eta Udalaren helburua ez da gazteak Alemaniara bidaltzea, baizik eta gazteen formazioa hobetzea. Udala handik itzultzen direnean hemengo lantegietan lana izan dezaten ere lan egiten ari da.
Zabaletak gaurko foroan eman du egitasmo honen berri. Antzuolako eta Idiazabalgo alkateek ere euren anaitze esperientzien berri eman dute. Ondoren, aurreskua dantzatu dute, Europar Batasuneko ereserkia jarri dute eta Europar Batasuneko bandera altxatu dute.
