Urretxuko Udalak larunbat honetan irekiko du Pagoetako igerilekua. Aurtengo denboraldiak hiru hilabete iraungo du: ekainaren 11n hasi eta irailaren 11n bukatuko da.
25 urte pasa dira dagoeneko eta igerilekuak berrikuntza sakon bat behar du, baina horretarako diru asko behar da. Udala alternatiba ezberdinak aztertzen ari da. Bien bitartean, aurten behar-beharrezkoak diren lanak egin dira. Aipatzekoa da baldosei eta eskailerei tratamendu berezi bat eman dietela labaingarriak izateari utz diezaioten.
Urretxuko kirol txartelak igerilekua eta kiroldegia erabiltzeko aukera ematen du. Salneurriak honakoak dira: 3-18 urte bitartekoek, ikasle eta langabetuek eta jubilatu eta pentsiodunek 54 euro ordaindu behar dute, 18 urtetik gorakoek 108 euro eta familiek 161 euro. Familia unitate berean diru-sarrerarik ez duten kide guztiei egingo zaie abonatu txartela, 23 urtetik beherako seme-alaba kopurua kontuan izan gabe.
Sarreren prezioari dagokionez, 3-18 urte bitartekoek 2 euro ordaindu behar dute, ikasle eta langabetuek 3,45 euro eta 18 urtetik gorakoek 4,60 euro. Hamar sarrerako bonoak 40 euro balio du.
Karneta Aldiri kiroldegian egin behar da: 09:00etatik 13:00etara eta 17:00etatik 20:00etara. Informazio gehiago nahi dutenek, 943 03 80 92 telefono zenbakira deitu behar dute. Karneta egiteko orduan, karnet tamainako argazki bat, NANa, kontu zenbakia eta norbere egoera egiaztatzen duen agiria aurkeztu behar dira.
