Gaur goizean langile bat hil da Zuhaiztiko etxeetako obran. Urretxuko Udalaren Bozeramaileen batzordeak adierazpen instituzionala onartu du atsekabea adierazteko. Elkartasuna helarazi nahi diete langilearen senitartekoei, lankideei eta lagunei. Aldi berean, lan istripuak salatu dituzte eta pertsona batek lanean bizitza galtzea gaitzetsi dute.
Urretxuko Udalak istripuak «kosta ahala kosta eta guztiaren gainetik» ekidin behar direla adierazi du. «Lan guztietan segurtasunak lehentasuna izan behar du». Horretaz gain, langileen alde egin dute. «Pertsonak dira gure herrialdearen garapen sozial eta ekonomikoaren muina. Horregatik, ezinbestekotzat joten dugu lan-osasunari eta segurtasunari buruzko kanpainak jarraitzea eta lan-arriskuen prebentziorako arauak betearaztea».
Hori dela eta, nagusiei eta langileei laneko segurtasunari eta osasunari buruzko araudia zorrotz betetzeko eskatu diete. Eta erakundeei lan-arriskuen prebentzioa lantzeko eskatu diete, sindikatu eta patronalekin koordinatuta. Osasunaren aurkako delituak jazartzeko eta ikuskapen lanak gehitzeko eta hobetzeko ere eskatu dute. Bukatzeko, udalak istripua salatzeko eta familiari elkartasuna eta babesa adierazteko ekimen guztiekin bat egin du eta herritarrei ekimen horietan parte hartzeko eskatu die.
