Atzo Turismo, Merkataritza eta Kontsumoko Euskadi sariak banatu ziren Donostiako San Telmo museoan. Aurten 50 urte beteko dituen Zumarragako Mentxu y Yone denda eta Urretxuko Kontsumo Informaziorako Udal Bulegoa saritu dituzte, besteak beste. Ekitaldian Arakama-Munitxa familiako hiru belaunaldiek eta Jon Luqui Urertxuko alkateak parte hartu zuten.
Agintariak ere bertan izan ziren, noski: Javier Hurtado Eusko Jaurlaritzako Turismo, Merkataritza eta Kontsumoko sailburua, Clara Navas Turismoko zuzendaria, Izaskun Gomez Merkataritzako zuzendaria eta Ana Sanchez Kontsumobideko zuzendaria. Sari hauek Euskadirentzat estrategikoak diren esparru horiei lotutako profesionalen, enpresen eta erakundeen ibilbidea, konpromisoa eta jardunbide egokiak aitortzen dituzte.
Ekitaldian, sailburuak zoriondu egin zituen saritutako pertsonak eta erakundeak, eta nabarmendu zuen herrialdearen garapen ekonomiko eta sozialean egunero laguntzen duen sektore oso baten “ilusioa, profesionaltasuna eta konpromisoa” ordezkatzen dutela.
Bestetik, ekitaldiak balio izan zuen hurbileko merkataritzaren lana eta herri eta hirien kohesio ekonomiko eta sozialean duen zeregina nabarmentzeko. Hurtadok gogorarazi zuenez, merkataritzak 134.000 lanpostu baino gehiago sortzen ditu Euskadin, BPGaren % 11 da, eta funtsezko elementua da hiriko bizitzarako.
Era berean, kontsumitzaileen eskubideen defentsarekin, enpresa-jardunbide egokien sustapenarekin eta kontsumoaren arloko interes publikoko informazioaren zabalkundearekin lotutako erakunde eta profesionalen lana saritu zen. Sailburuak gogorarazi zuen Kontsumobidek 41.000 kontsulta eta 27.000 erreklamazio baino gehiago kudeatu zituela 2025ean, eta zifra horrek kontsumo ohituren bilakaera eta herritarrek beren eskubideei buruz duten kontzientziazio handiagoa islatzen dituela.
Sailburuak bere hitzaldian azpimarratu zuenez, turismoa eta merkataritza EAEko BPGaren %18 inguru dira, eta enpleguaren %25 inguru sortzen dute, jarduera horiei zuzenean lotutako 240.000 familia baino gehiagorekin. “Sari hauek profesional gutxi batzuk aitortzen dituzte, baina egunero Euskadi lehiakorragoa, jasangarriagoa eta kohesionatuagoa eraikitzen laguntzen duten milaka pertsonaren lana sinbolizatzen dute”, adierazi zuen.
- Aurtengo edizioan, Turismoaren arloan, Santxotena Tailer Museoa saritu dute Ibilbidea Sariarekin, Ocean Tours Hondarribia Ekintzailetza Sariarekin eta Gorbeia Helmuga Turistikoa Helmuga Arduratsua eta Jasangarria Sariarekin.
- Merkataritza kategorian, honako hauek jaso dituzte sariak: Fernandez Terreros harategia, Ibilbidea Saria; Erase una vez, Ekintzailetza Saria; eta Bilbaodendak, Merkataritzako Eremuak Dinamizatzeko Saria.
- Kontsumoaren arloan, Urola Garaia Mankomunitateko Urretxuko KIUBak (Kontsumo Informaziorako Udal Bulegoak) Kontsumitzailea Saria jaso du, SOILIK, S. Coop.ek Jardunbide Egokiak Saria eta Consuma Crudeza Komunikazioa Saria.
- Sari Bereziak ere banatu dira: Ilunion Hotels, Turismo kategorian; Mentxu y Yone, Merkataritzan; eta Telmo Lazkano, Kontsumoan.
- Era berean, Turismo, Merkataritza eta Kontsumo Sailaren Sari Berezia Petritegi sagardotegiari eman zaio, Euskadiko turismoaren, merkataritzaren eta kontsumoaren sektoreak garatzen eta sustatzen laguntzeagatik.
