Goierri kirol elkartearen areto futbol saileko gizonezkoen lehen taldeak ateak itxita jokatuko ditu Aldiri kiroldegian jokatuko dituen denboraldiko azken partidak. Klubak berak erabaki du hala jokatzea, martxoaren 2an egondako istilu batzuengatik.
Inauterietako larunbatean Goierrik Durangoko Sasikoa taldearen aurka jokatu zuen. Epaileak partida gelditu zuen, mozorrotuta zeuden gazte batzuk pistolekin plastikozko bola bat jaurti ziotelako. «Gazte hauek jarraitzaile sutsuenak egoten diren tokian zeuden eta harmailaren zati hori hustu genuen arte, partida geldirik egon zen», aipatu du Javier Garcia de Andoin Goierri elkarteko lehendakariak.
Epaileak aktan bola jaurti ziotela jarri zuen eta federaziokoek areto futbol saileko arduradunari deitu zioten. «Berriro halako zerbait gertatzen bada, kiroldegia itxiko digutela ohartarazi zioten. Goierriren historian ez da halakorik gertatu».
Hala, klubak gutun bat bidali zuen federaziora, epaileari eta federazioari barkamena eskatuz. Gainera, falta diren partidak ateak itxita jokatzea erabaki dute. «Taldea gaizki doa eta jarraitzaileen babesa behar du, baina ezin gara arriskatu. Kiroldegia ixten badigute, beste herri batean jokatu behar dugu eta bidaia ordaindu».
