Larunbatean, 16:00etan, Urretxu eta Zumarragako 6. duatloi txikia egingo dute Areizaga-Kalebarren plazan. 9-14 urte bitarteko gipuzkoarrek parte hartu ahal izango dute. Hiru taldetan banatuta parte hartuko dute: 9-10 urte, 11-12 ute eta 13-14 urte.
Gazteenek 450 metro egingo dituzte korrika eta 1.500 bizikletan, antolakuntzako laguntzaileen artean. 2007 eta 2008an jaiotakoek 750 metro egingo dituzte korrika, 2.000 metro bizikletan eta, bukatzeko, 450 korrika. 2005 eta 2006 urteetan jaiotakoek, 1.200 metro korrika, 2.000 metro bizikletan eta 450 metro korrika. Beharrezkoa da norberak bizikleta eta kaskoa eramatea. Proba hasi aurretik bizikleta plazan utzi beharko da, kaskoarekin batera, horretarako prestatuko duen tokian.
Izena eman ahal izateko Urretxu, Zumarraga eta Legazpiko eskoletan banatuko diren orriak beteta eraman behar dira. Egunean bertan 15:30ak arte ere izena emateko aukera egongo da. Antolakuntzari lana errazteko, 15:00etarako bertan egotea komeni da. Hiru irteera banatu egongo dira. 16:00etan 2009 eta 2010ean jaiotakoak irtengo dira, ondoren 2007 eta 2008an jaiotakoak eta azkenik 2005 eta 2006an jaiotakoak.
Parte hartzaileei oroigarri bana emango diete. Sari banaketa 17:00etan izango da. Lasterketa bakoitzeko lehen hiru neskak eta mutilak podiumera igoko dira. Bukaeran, denek batera taldeko argazkia aterako dute.
