Felix Medranok (Zumarraga, 1957) erretiroa hartu zuen joan zen ostiralean. Egun bezainbeste dentista ez zeuden garai batean hasi zen lanean eta oso ezaguna da Goierrin.
Non egin zenituen oinarrizko ikasketak?
Urte hauetan guztietan nire kontsulta izan dena, nire izeben akademia izan zen garai batean. Akademia hartan ikasi nuen, Batxilergoko 4. mailara arte. Ondoren, Gasteizko San Viator ikastetxera joan nintzen. Batxilergoa han bukatu nuen. Handik Nafarroako Unibertsitatera joan nintzen, Medikuntza ikastera. Espezialitatea EHUn egin nuen. Estomatologiako bigarren promoziokoa naiz.
Oso argi al zenuen dentista izan nahi zenuela?
Ez. Nik Medikuntza ikasi nahi nuen. Nire aitona eta nire aita albaitariak izan ziren. Beraien ofizioa eta nirea antzekoak dira, baina ez berdinak. Nire bulegoa aitonaren bulegoa izan zen. Armairuak albaitarien intsignia du.
Zergatik erabaki zenuen orduan Estomatologia espezialitatea egitea?
Praktiketako urtea, seigarrena, aurpegi-masailetako kirurgia sailean egin nuen. Gustatu egin zitzaidan eta hori egitea erabaki nuen. Garai hartan, lehenengo Estomatologia egin behar zen eta ondoren Aurpegi-Masailetako Kirurgia. Oso espezialitate luzea zen. Baina Estomatologia amaitu ondoren lanean hasi nintzen eta azkenean ez nuen Aurpegi-Masailetako Kirurgia egin.
Non hasi zinen lanean?
Bilbon nengoela, Itziar Oñatibiak bere kontsulta alokatzea eskaini zidan. Atzerrira joateko asmoa zuen, baina ez zuen kontsulta itxi nahi. Beldur pixka bat nuen, baina ez kezkatzeko esan zidan. Josetxo Landa Itziarren protesikoarekin lan egin nuen. Asko lagundu zidan lehen hilabete haietan. Andres Goiarekin ere lan egin nuen. Ondoren, nire kasa hasi nintzen.
Beti Zumarragako Jai Alai kaleko lokal honetan lan egin al duzu?
Bai. Lokal hau nire izebena zen eta hutsik zegoen. 42 urte eman ditut hemen.
Itziar Oñatibia ordezkatu zenuen garaian ofizioa gustatu zitzaizula dirudi.
Hala da. Jendearekin harremana gustukoa baduzu, pazientearekin aurrez aurre lan egiten diren gainontzeko espezialitateak bezala, polita da. Gainera, oso espezialitate zabala da, hala ez dirudien arren. Operazioak, kirurgia, detekzio goiztiarrak… Minbizi batzuek ahoan eragin handia dute eta horri esker guk goiz detektatu ditzakegu.
Gustura lan egin duzu, beraz.
Oso gustura. Uzteak pena ematen dit, baina bakarrik lan egiten dut eta adinean aurrera egin ahala kontsulta bakarrik kudeatzea zailagoa da. 67 urte bete behar ditut eta lan egiteari uzteko garaia da. Zorionez, ez dut osasun arazorik.
Zure kontsultatik hiru belaunaldi pasa dira.
Hala da. Paziente batzuk «Nora joango naiz orain?», galdetu didate. Ez kezkatzeko esan diet, ondo konponduko direla. Penarik handiena adinekoek ematen didate, horiei gehiago kostatzen baitzaie egoera berrietara egokitzea. Paziente batzuek 40 urte baino gehiago eman dituzte nirekin.
Ez al du inork zure kontsulta hartuko?
Hori gustatuko litzaidake, baina ezinezkoa suertatu da. Egungo gazteek beste mentalitate bat dute. Espezialistak dira, ez medikuak. Ez dute kontsulta bat hartu nahi. Soldatapeko izan nahi dute. Gainera, gure atarian sekulako obra egin behar dute eta ez da lokal hau beste bati uzteko garai onena.
Zure pazienteak izan direnei zerbait esan nahi al diezu?
Oso gustura lan egin dut eta guztiei eskerrak eman nahi dizkiet. Hanka sartzeren bat egingo nuen, baina ez dut sekula lanik falta izan. Ez da seinale txarra.
Herritik kanpoko pazienteak ere izan dituzu.
Toki askotakoak. Nafarroatik asko etortzen ziren: Azkoienetik, Iruñetik… Lanean hasi nintzenean egun baino askoz ere dentista gutxiago zeuden. Hasi nintzenean, herri askotatik deitu zidaten. Izan ere, herri askotan ez zegoen dentistarik.
Ofizioa asko aldatu al da?
Bai. Garai batean askoz ere baliabide gutxiago zeuden. Baina hori lanbide guztietan gertatu da. Bestalde, gu medikuak ginen. Egun, odontologoak dira. Ez dute aurretik medikuntza ikasi, guk bezala. Hori dela eta, egun taldean lan egiten dute. Hori ona da.
