Urretxuko EH Bilduk udal hauteskundeetarako hautagai zerrenda aurkeztu du. Horra hor igorritako oharra.
“Urretxuko EH Bilduk datorren maiatzaren 28an egingo diren udal hauteskundeetarako bere hautagaitza zerrenda osatu du. EH Bilduko komunitateko kideak, baina baita sektore ezberdinetan lanean dihardutenekin ere. Berritasunez betetakoa da pausua eman duten emakume eta gizonen zerrenda, Urretxuk parez pare dituen erronkei heltzeko prest eta determinazio osoz bere onena emango dutenak. Azken batean, Gipuzkoara datorren aldaketa baliatu eta herriak zein eskualdeak dituen potentzialitate osoekin garai berrietara egokituko dena, udala eta herriaren arteko elkarlana sustatuko duena eta herritar guztien ongizatea ardatz izango duena.
Aipatu moduan, zerrenda kideek udal kudeaketan zein herrigintzan eskarmentu handia dute, norberak bere alorrean, eta ekarpen horretatik abiatuta herrigintzan sakontzeko urratsa egingo dute, demokrazia kooperatiboan urratsa eman eta etorkizuneko proiektuak herritarren behar eta nahiei bide emango dietena. Azken asteotan aipatu moduan, Jon Altolagirre Askasibar izango da zerrendaburu eta alkategaia. 2011-2015 legegintzaldian zinegotzi eta gobernu taldeko kide izan zen eta azken zazpi urteetan Europako Parlamentuan aritu da lanean”.
Berarekin batera, honako kide hauek osatuko dute zerrenda:
Julen Azpeitia Erauskin, Urretxu, 24 urte. Zuzenbidean graduatua da eta Abokatutza masterra eta Gobernantza eta Politika Ikasketak masterra egin ditu. Urretxuko udala barrutik ezagutzen du, praktikak egin baititu bertan. Kirol talde ezberdinetan aritu izan da. Egun, abokatutzan dabil lanean.
Amaia Galvez Itarte, Urretxu, 48 urte. Informatikaria ikasketaz, informatika enpresa bateko kooperatibista da egun. Alor honetan irakasle aritu izan da. Gaur egun software garatzailea eta saileko arduraduna da. Boluntario lanean aritu da hainbat irabazi asmorik gabeko elkartetan.
Nekane Oruesagasti Aramendi, Urretxu, 55 urte. Azken lau urteotan Urretxuko EH Bilduren bozeramaile izan da udalean. Autoeskolako irakasle izan da 20 urte luzez eta erizain-laguntzaile ikasketak ditu.
Ricardo Ritxi Babarro Antolin, Bilbo, 62 urte. Hispaniar Filologian lizentziatua da eta bere ibilbide profesionala irakaskuntzan eman du, Urretxu-Zumarraga Ikastolan. Euskalgintza, kulturgintza eta herrigintzako zenbait taldetan partu hartu du.
Nerea Gabirondo De la Hera, Urretxu, 32 urte. Lehen Hezkuntzan eta Heziketa Fisikoan graduatua. Egun irakasle lanetan dabil. Euskalgintzako zenbait lanetan aritua izan da.
Andoni Ausin Elorza, Urretxu, 49 urte. Hezkuntza Berezian ikasketak eta aniztasun funtzionala duten pertsonekin aritu izan da lanean, zazpi urtez Urretxu-Zumarraga Ikastolan, besteak beste.
Maria Jauregi Ruiz, Urretxu. 30 urte. Animazio Soziokultural eta Turistikoko eta Ingurumen Hezkuntza eta Kontroleko goi-mailako teknikaria. Euskara dinamizatzaile lanetan dabil gaur egun eta Urola Garaiko Koordinadora Feministako kidea da.
Iñaki Etxaniz Arregi, Urretxu, 45 urte. Gainzuri ikastetxeko zuzendaria, Lehen Hezkuntzako eta Haur Hezkuntzako irakaslea da. Urola Triatloi Klubeko kidea da.
Amaia Agirre Ugartemendia, Beasain, 70 urte, jubilatua eta PAC/EAG 24/7 irekia plataformako kidea.
Zerrenda osatzen dute: Mikel Elgarresta Mintegi, abeltzaina eta egungo zinegotzia; Igone Nestar del Rio, Heziketa Laguntzako espezialista, egungo zinegotzia eta Gure Esku eta Lurra dantza taldeko kidea; Joseba Garmendia EHUko Ekonomia irakaslea; Iguntze Aseginolaza Yurrebaso, Metalgintzako langilea eta Lizarriturri txistulari taldeko kidea; Xabier Etxaniz Maiztegi, Metalgintzako langilea eta euskal kulturgintzan aritua eta; Igor Urrestarazu Mujika, Metalgintzako langilea eta LABeko ordezkaria; eta Oihane Zabaleta Mujika, Urretxuko alkate ohia.