Lehenengoa apirilaren 11n izango da eta bigarrena maiatzaren 24an
Ongizate emozionalaren zaintzaren beharrak gizartean indarra hartu duen honetan, Urretxuko Udalak gaiari heldu nahi izan dio, eta 17 eta 24 urte bitarteko gazteei prestakuntza eskainiko die apirilean eta maiatzean egingo dituen bi saioren bitartez. Gazteria sailak Gipuzkoako Foru Aldundiarekin elkarlanean abiatuko du gazteen ongizatea lantzeko bidea. Lehen saioaren izenburua Ongizate emozionala: oinarrizko da eta bigarrenarena Ongizate emozionala: stop antsietatea.
Ongizate emozionala: oinarrizko ikastaroa apirilaren 11n izango Urretxuko kultur etxean, 17:00etatik 20:00etara. Ainhoa Urretagoiena adituak nork bere burua ezagutzen eta maitatzen ikasteko ikastaroa eskainiko du. «Gazteen ahalduntze prozesuetan onarpen pertsonalak berebiziko garrantzia du; aurrera egin ahal izateko lehen pausoa norberaren burua ezagutu eta maitatzen ikastea da». Hala, izena ematen dutenek ongizate emozionala bermatzeko oinarriak ikasiko dituzte eta autoezagutzari buruzko lehen pausoak emango dituzte. Izena gip.eus/dqbrl helbidean eman behar da.
Prebentzioa
Ongizate emozionala: stop antsietatea ikastaroa, berriz, maiatzaren 24an izango da, leku berean 10:00etatik 13:00etara. BadaBideBat-ek eskainiko du. Gazteei euren zailtasunei aurre egiten laguntzen dien elkartea da. Antsietate egoeren prebentzioa landuko dute ikastaro horretan. Izen ematea aurki zabalduko dute.
