Josune Gil zumarragarrak Kazetaritza ikasi zuen eta ondoren Komunikazio Digital masterra egin zuen. Noticias de Gipuzkoa egunkarian lan egin zuen eta Eibar kirol elkartearen emakumezko futbol taldeko prentsa arduraduna izan da. Irakurtzea oso gustuko du eta egun idazle berriei laguntzen lan egiten du. Etzi Liburu Eguna ospatuko da. Egun horretan oparituko diren liburuetako batzuk Gilen laguntzari esker argitaratu dira.
Noticias de Gipuzkoa egunkarian zierrean lan egiten zuen. «Ez da sormen lana eta aldatu egin nahi nuen. Komunikazio Digitala ikasi nuenez, Eibarrera joateko aukera izan nuen. Nire asmoa esperientzia hartzea zen. Bi urte eta erdi eman ditut bertan. 10 urte egotea bezala izan da. Lan horretan asko ikasten da, bizi osorako. Kazetaritzatik komunikazio korporatibora pasa nintzen. Futbol mundua ez da lanerako erraza. Nesken taldean prentsa burua izan nintzen. Baina denetik egin behar nuen: sare sozialetarako piezak sortu, kanpainak sortu… Gauza batzuetarako kanpoko agentzien laguntza genuen, baina gehiena guk geuk egiten genuen: bazkidetza kanpainak, Gabonetako kanpainak, egun berezietako kanpainak (Martxoak 8koa, adibidez)… Profil batekin sartu nintzen, baina klub txikia denez, denetik egin behar nuen. Taldearekin bidaiatu, prentsaurrekoak eta elkarrizketak kudeatu…».
Oso lan aberasgarria da, baina gogorra. «Besteek jai dutenean zuk lan egin behar duzu, ez duzu Aste Santuko oporrik… Ligaren egutegira egokitu behar zara. Ordutegiak, asteburuak… oso lan gogorra da. Oso bokazionala da. Futbol munduan lan egin nahi duen jendearentzat soilik da egokia. Esperientzia bezala oso polita da, asko ikasten da gauza ezberdin asko egiten direlako… baina oso neketsua da. Futbola oso gustuko dutenek bakarrik eman ditzakete urte asko lan horretan».
Lan aldaketa
Hala, lana uztea erabaki zuen. «Eibarren lanean ari nintzen bitartean, liburuen edizio masterra egin nuen, online. Izan ere, beti izan dut liburuen munduan lan egiteko gogoa. Agentzietara, argitaletxeetara… curriculuma bidali nuen, baina oso zaila da horietan sartzea. Zorionez, Bartzelonako agentzia batek erantzun egin zidan eta irakurketa txostenak egitea eskaini zidan: galbahe lana egitea, alegia. Idazle berriei zerbitzu hori eskaintzen diete, diru truke. Idazleek liburuak bidaltzen dizkiete eta guk txostenak egiten ditugu. Hilero hiru bat liburu irakurtzen ditut. Kalitatea baloratzen dut eta argitaletxekoek liburu horrekin zer egin erabakitzen dute. Balorazio narratiboa eta balorazio komertziala egiten dut, batetik zazpira. Bostetik beherakoak baztertu egiten dituzte, zuzenean. Ardura handia da niretzako, idazle berri horiek gogor lan egin baitute».
Horretaz gain, idazle gazteei beraien lanak hobetzen laguntzen diete eta Gilek horretan ere lan egiten du. Egun, bi agentziekin lan egiten du, baina baita bere kasa ere. «Agentziek liburu asko jasotzen dituzte eta beraien galbahea pasatzea oso zaila da. Hori dela eta, nire kasa, idazle berriei beraien lanak hobetzeko zerbitzua eskaintzen hasi naiz. Izan ere, askotan beraiek liburua bukatuta dagoela uste dute, baina ez da hala. Askotan, liburua ona da, baina oraindik badu zer hobetu. Liburua agentzietara bidali aurretik nola hobetu esaten diet».
Horretarako, sare sozialetan bere profila sortu du. «Idazleei zuzendua dago. Agentziekin lan egiten dudala jarri dut, noski. Hori dela eta, pare batek liburua agentziara bidaltzeko zenbait ordaindu behar dudan galdetu didate. Baina hori ez da nire lana, nire lana liburua agentziara ahalik eta ondoen bidaltzea da. Nik agentziara bidali dezaket, baina ezin dut agentziaren gustukoa izatea bermatu eta, gainera, nahiz eta agentziak gustuko izan, ondoren argitaletxeen gustukoa izatea lortu behar du. Nire sare sozialeteko profilean, aipatutako lanaz gain, literaturari buruzko bideoak egiten ditut».
Josune Gili umetatik gustatzen zaio irakurtzea. «Oso txikitan ikasi nuen irakurtzen. Amak eta izebak asko irakurtzen dute. Nire ustez, horrek eragina izan du. Asko kostatzen zait liburu bat aukeratzea. Azkenaldian irakurri ditudanen artean Jose Luis Sastre kazetariaren Las frases robadas gustatu zait. Bere lehen liburua da. Gaixotasun terminal bat duen gizon baten istorioa da. Alabari hiltzen laguntzeko eskatzen dio eta alabak ez du nahi. Lucia Solla Sobralen Comeras flores ere asko gustatu zait. Sekulako arrakasta izaten ari da. Gizonezko batekin harreman toxikoa izan duen neska bat da protagonista».
Idazlea ere bai
Irakurtzeaz gain, idaztea ere gustatzen zaio. «2021etik aurrera elkarrizketak egin dizkiet dolu perinatala pairatu duten emakumeei. Baita abortua izan dutenei ere. Erreportaje moduan idazten hasi nintzen, baina ez zitzaidan formatua gustatu. Gauza asko nahastu nituela iruditu zitzaidan. Nobela bezala idazten ere hasi nintzen, baina ez nengoen gustura. Baina argitaratu egin nahi dut eta aditu batengana jo nuen. Gustatu egin zitzaion eta coach bat jarri behar didate. Nobela gisa argitaratu nahi nuke».
