Urola Garaia mankomunitateak klima aldaketaren ondorioetara egokitzeko urratsak ematen jarraitzen du. Testuinguru horretan, Guardasola Garaia: beroari itzala, herritarrei babesa kanpaina jarri du martxan. Ekimen horren helburua herritarrak bero boladen aurrean kontzientziatzea eta klima babesguneen sarea ezagutaraztea da. Eskualdeko hainbat gune ia 800 guardasolekin estaliko dira, Agenda 2030aren eta Urola Garaiko klima babesguneen koloreak erabiliz. Instalazioek ikusgarritasun eta erakargarritasun handia izango dute, baina mezu argi bat ere helaraziko dute: beroaren aurrean babestea guztion ardura da, eta mankomunitatea herritarrentzat espazio seguruagoak, freskoagoak eta egokiagoak eskaintzeko lanean ari da.
Ekimen hau lankidetzaren emaitza da. Uggasa garapen agentziak, Legazpi, Urretxu, Zumarraga eta Ezkio-Itsasoko udalek, ikastetxeek, merkatarien elkarteek eta turismo arloak elkarrekin hausnartu dute klima egokitzapenaren inguruan zer egin daitekeen aztertzeko: nola jokatu bero boladen aurrean, nola babestu herritarrak eta nola prestatu udalerriak klima aldaketaren ondorioei erantzuteko.
Bero handiko egunetan, herritarrek ere norberaren babeserako neurriak hartu behar dituzte: eguzkipean zuzenean egotea saihestu, behar bezala hidratatu eta arreta berezia jarri pertsona zaurgarrienei, bereziki adinekoei. Aldi berean, lau udalak eta Uggasak klima babesguneen sare bat definitzen ari dira. Babesgune horiek barruko zein kanpoko espazioak izan ahal izango dira, eta bero boladen edo muturreko tenperaturen aurrean osasuna eta ongizatea babesten laguntzea izango dute helburu.
Kanpainak azken bi ikasturteetan Eskolako Agenda 2030 programaren esparruan egindako lana ere jasotzen du. Urola Garaiko zortzi ikastetxeek klima aldaketa, osasuna, ongizatea eta klima babesguneak landu dituzte. Ikasleek egindako diagnostikoaren ondorio nagusietako bat da gai honen inguruan informazio eta sentsibilizazio handiagoa behar dela. Hori dela eta, duela gutxi Klima Tour azoka egin zen eta orain guardasolen kanpaina egingo da.
Guardasolak pixkanaka agertuko dira eskualdeko lau udalerrietan, kokapen zehatzak aurrez jakinarazi gabe, sorpresa efektua mantentzeko helburuarekin. Zumarragan dagoeneko guardasolak jartzen hasi dira. Urretxun ekainaren 30ean jarriko dituzte, Legazpin uztailaren 2an eta Ezkio-Itsason uztailaren 20an.
Klima aldaketara egokitzea premiazko erronka da eta beroaren aurrean itzala, babesa eta komunitatearen zaintza behar ditugu.
