Gurutze Gorria eta Zumarragako Udala elkarrekin lan egiten ari dira beroari aurre egiteko
Zumarragako Udala eta Gurutze Gorria elkarrekin lanean ari dira bero boladei aurre egiteko. Gurutze Gorriak ura, eguzkitako krema eta triptikoak banatuko ditu bero handia egiten duen egunetan.
Mikel Serrano Zumarragako alkateak eta Oier Mujika Gurutze Gorriko kideak prentsaurrekoa egin zuten atzo Zumarragako babesleku klimatikoetako batean: mankomunitateak Clara Larrañaga parkearen sarreran jarri dituen guardasolen azpian.
Serranok zaurgarrienak babestu behar direla gogoratu zuen. «Laugarren bero bolada honi nola aurre egin zehazteko elkartu gara, zaurgarrienek gutxiago sufritu dezaten. Alerta dagoen bakoitzean nola jokatu zehaztu dugu. Gaixotasun kronikoak dituztenengana, adinekoengana, haurrengana… nola heldu. Gurutze Gorriak triptikoak banatuko ditu. Bertan bero boladetan zer egin azaltzen da».
Bestalde, Zumarragan hainbat babesleku klimatiko daudela gogoratu zuen: Zelai Arizti parkea; San Isidro auzoko zubiko, Antonino Oraako, Legazpi dorretxeko, Legazpi auzoko eta ospitale atzoko lorategiak; Izazpi auzoko parkea eta kantxa estalia, Argixao auzoko lorategia; Secundino Esnaolako parkea; Ibaiondoko pasealekua; bidegorria; azoka; jubilatuen egoitza; udaletxeko arkupea; parrokiako arkupea eta Eitzagako gune berdea.
Gurutze Gorriari eskerrak eman zizkion. «Beti dagokizuen tokian zaudete, gizartearekin duzuen konpromisoa dela eta. Oraingoan, Urola Garaiko Gurutze Gorriko bost kide Madrilera joan dira, bertako sutean kaltetutakoei laguntzera. Zuetaz harro gaude».
Hitzaldia
Mujikak Gurutze Gorriaren Bero-bero kanpainaren berri eman zuen. «Duela dezente jarri genuen martxan. Zaurgarritasun egoeran daudenei deitzen diegu, nola dauden jakiteko eta laguntzeko. Zumarragan hamazazpi bizilaguni deitu diegu. Horretaz gain, minbiziaren aurkako elkartearekin batera, hitzaldia egin dugu. Bertan, bero boladen aurrean nola jokatu azaldu dugu, azaleko minbizia saihesteko».
Horretaz gain, alerta egoera dagoenean kalera aterako dira eta herriko toki ezberdinetan ura eta eguzkitako krema banatuko dituzte eta aholkuak emango dituzte. «Guztiok elkarrekin aurre egingo diogu egoera lazgarri honi», amaitu zuen alkateak.
