0 eta 3 urte bitarteko haurrei eta haien guraso, tutore edo zaintzaileei zuzenduta dago
Gure Txoko jubilatuen etxeko Txiki-Txokoak bihar (ostirala) irekiko ditu berriro ateak, 0 eta 3 urte bitarteko haurrei eta haien guraso, tutore edo zaintzaileei zuzendutako zerbitzuaren denboraldi berriari hasiera emanez. Zerbitzua ekainaren 7ra arte egongo da martxan, bi egunak barne.
2026-2027 ikasturtean, Gure Txokoko Txiki-Txokoak BLESK enpresaren zaintza izango duten ordutegiak eta familien ardurapean kudeatuko diren beste batzuk uztartuko ditu.
Ostiraletan, zerbitzua 17:00etatik 20:00etara egongo da zabalik, BLESKen zaintzarekin.
Larunbatetan, espazioa 9:00etatik 13:30era erabili ahal izango da familien ardurapean. Arratsaldez, 17:00etatik 20:00etara egongo da zabalik. Urrian, larunbat arratsaldeetan BLESKen zaintza egongo da; azarotik aurrera, berriz, familiek eurek kudeatuko dute ordutegi hori ere.
Igandeetan, goizez 09:00etatik 13:30era egongo da zabalik familien ardurapean, eta arratsaldez 17:00etatik 19:45era, BLESKen zaintzarekin.
Kasu guztietan, haurrak heldu arduradun batekin egon beharko dira une oro, eta ezingo dira Txiki-Txokoan bakarrik geratu.
Zerbitzua erabili ahal izateko, familiak izena emanda egon beharko du eta Txiki-Txokoko eskubide eta betebeharren dokumentua bete eta onartu beharko du. Arau horien helburua bizikidetza egokia eta espazioaren zein bertako materialen erabilera zuzena bermatzea da.
Gure Txokoko gehieneko aforoa 30 lagunekoa izango da. Era berean, espazioa txukun mantentzeko, materiala zaintzeko eta gainerako erabiltzaileak errespetatzeko beharra gogorarazi da. Besteak beste, haurrek zein helduek zapatak kendu beharko dituzte sartzeko, eta ezin izango da barruan jan, edoskitzea salbu.
Zerbitzua 2026-2027 ikasturterako ezarritako egutegiaren arabera eskainiko da; bertan jasotzen dira Txiki-Txokoa itxita egongo den egunak ere.
Ekimenaren jatorrian Lepaka eta Non Daude Haurrak elkarteek egindako eskaera dago, haur txikiak dituzten familiek espazio egoki baten beharra zutela ikusita. Zumarragako Udalak 2024ko azaroan jarri zuen martxan Gure Txokoko zerbitzua, hasiera batean proba pilotu gisa, eta, ondoren, Urretxuko Udala ere egitasmora batu zen. Gaur egun, bi udalek elkarlanean eskaintzen dute Txiki-Txoko zerbitzua, haren sorrera bultzatu zuten elkarteekin elkarlanean.
Hasieratik, zerbitzuaren helburua izan da haurrek kalitatezko aisialdirako espazio bat izatea, haien garapen integrala sustatuz eta, aldi berean, guraso, zaintzaile eta hezitzaileen arteko harremanak eta topaketak erraztuz.
Zerbitzuaren bilakaeran familien harrerak ere garrantzi handia izan du. Lehen ikasturtean, 2024ko azarotik 2025eko ekainera, 3.726 erabilera zenbatu ziren; horietatik 1.547, 0 eta 3 urte bitarteko haurrenak. Guztira, 79 familiak eman zuten izena, gehienak Zumarraga eta Urretxukoak.
