Gloria Vazquez Gipuzkoako Foru Aldundiko Ingurumen Administrazioko zuzendariak eta Mikel Serrano Zumarragako alkateak Banaezinak erakusketa aurkeztu dute gaur Zelai Arizti kultur etxean. Erakusketa ibiltari hori Aranzazi Zientzia Elkarteak ekoitzi du, aldundiarekin sinatutako lankidetza hitzarmenaren barnean. Erakusketak gizakiak naturarekin duen harremana aztertzen du.
Naturak bizirauteko oinarrizko baliabideak eman dizkio gizakiari, eta, horri esker, espezie gisa gaur egunera arte iritsi gara. Aldi berean, gizakiak bere beharren arabera eraldatu du ingurunea. Elikadura, babesa, sinesmenak eta gizarte antolaketa izan dira natura ustiatzeko arrazoi nagusietako batzuk, eta prozesu horren ondorioz paisaia eta ingurunearen bilakaera baldintzatu ditugu.
Naturarekin izandako harreman estu horri esker, gizakiok ezagutza ekologiko zabala garatu dugu. Jakintza hori belaunaldiz belaunaldi transmititu da, eta denborarekin ingurumenaren behaketa zientifikoaren bidez aberastu da. Gure arbasoen biziraupenerako ezinbestekoa izan den ezagutza horrek gaur egun arte iraun du.
Banaezinak erakusketak ibilbide historiko hori ezagutzeko aukera eskaintzen du, eta naturarekin dugun loturari buruzko hausnarketa proposatzen du. Izan ere, gizakiaren eta naturaren arteko harremana etengabea izan bada ere, zenbaitetan naturatik urrundu edo hari bizkarra emanda bizi izan gara.
Erakusketaren helburuen artean daude ikertzaileen lan zientifikoari balioa ematea, Gipuzkoako natura eta kultura ondare aberatsaren berezitasunak ezagutaraztea eta zientziak gizartearen garapenean duen funtsezko eginkizuna nabarmentzea.
Horretarako, azalpen edukiez gain, material zientifikoak eta etnografikoak ere biltzen ditu erakusketak. Besteak beste, bisitariek Mutrikuko leize batean berreskuratutako bisonte garezur baten erreplika, mikroskopioak, historiaurreko aizkora bat eta Aranzadi Zientzia Elkartearen etnografia eta ondare bildumako hainbat pieza ikusi ahal izango dituzte.
Azaroaren 23ra arte egongo da Zumarragan. Zelai Ariztiko erakusketa aretoa 09:30etik 13:30era eta 15:00etatik 20:30era irekitzen da astelehenetik ostiralera eta 10:00etatik 13:30era larunbatetan.
