La Salle, Gainzuri eta Iparragirre institutuko 150 ikaslek eta Aterpe elkarteko 12 emakumek egin dituzte eskulanak.
Urretxuko Udalak Gabon garaian herriko kaleak atontzeko apaingarri jasangarriak baliatu ditu aurten ere. Jon Altolagirre zinegotziak adierazi duenez «2011tik udala kontsumo arduratsuaren eta birziklapenaren inguruan» egiten ari den gogoetaren inguruko emaitzetako bat da.
Zinegotziak esandakoaren arabera, apaingarriak «La Salle eta Gainzuri ikastetxeetako eta Jose Mari Iparragirre institutuko ikasleek eta Aterpe elkarteko emakumeek» egin dituzte, Arazi Ingurumen Heziketa Proiektuak enpresako kideen laguntzarekin. Ekimena iaztik errepikatzen den arren, baditu aurten berrikuntzak, «batetik Aterpeko 12 emakumeek egindako lanak proiektura batzea, eta bestetik, led bidezko argiak apaingarriekin» uztartu izana.
Metodologia «erraza»
Aurten, material ezberdinak berrerabiliz pazko loreak egitea izan da ikasleen lana. Nerea Ibañez, Arazi enpresako kideak argitu duenez, «guztira 150 bat ikaslek hartu dute parte eta etxetik ekarritako plastikozko 300 bat botila» erabili dituzte. Proiektu hau Eskolako Agenda 21aren barruan landu dute eta, batez ere bi kontzeptu uztartzen ditu: «Ingurumenarekiko errespetua eta parte hartzea».
