Urtero ohitura bihurtu denez, Urretxuko eta Zumarragako udalek antolatuta hainbat ekintza izango dira haurrei eta gazteei zuzenduta Pazko Asteko egun hauetan zehar. Atzo arratsaldean hasi zituzten, esaterako, Urretxun Lizeo azpian haurrentzako urtero antolatzen dituzten ekintza saioak. Gazte Bideanen ere, Aste Santuko atsedenaldiaren ondotik, larunbatera bitartean hainbat ekintza antolatuta dituzte gazteentzat, larunbatera bitartean.
Askotariko ekintzak antolatu ditu Zerki kirol eta aisialdi zerbitzuak enpresak Lizeo azpian egun hauetarako. Asier Auzmendi Zerkiko kideak esan duenez, «eskulanak eta tailer ezberdinak» izango dituzte. Jolasteko aukerarik ere ez da faltako «ping-pong mahaiak eta futbolina» jarriko dituzte, baita gaztetxoenen gozagarri «puzgarri bat ere», besteak beste. Ekintzak «3 eta 12 urte arteko haurrei zuzenduta daude».
Lizeo azpiko lokala hilaren 25era arte egongo da zabalik, «11:00etatik 13:00etara eta 16:30etik 18:30era». Saio bakoitzerako sarrerak 2 euroan salduko dituzte sarreran bertan, eta «saio guztietarako bono bat ere eskuratu ahalko da, 10 euroan».
Gazteentzako ekintzak
Helduagoak direnek ere izango dute aisialdirako eskaintzarik egunotan. Gazte Bideanek egunero antolatu du zerbait, larunbatera bitartean 12 eta 17 urte arteko gazteei zuzenduta.
Gazte Bidean 16:30etik aurrera egongo da irekita egunero. Gaur, bideo forum-a izango dute, biharko mahai jolasen arratsaldea antolatu dute, ostiralean dardo txapelketa, eta larunbaterako Zer egingo dugu udan? galderari erantzuteko solasaldia antolatu dute.
