Urretxu-Zumarraga ikastolak ekitaldi bat antolatu du Kilometroak 2018 jaiaren antolakuntzan bidelagun izan dituen guztiei esker ona adierazteko. Ehunka herritar elkartu dira.
Hasteko, Zubizikletaren gurpilak entzun dira hitz egiten. Ondoren, ikasle batzuk Zubizikleta agertokira eraman dute eta ikastolako ordezkari batzuk bizikleta margotu dute. Kilometroak bukatu dela, baina ikastolak aurrera jarraituko dutela irudikatu dute.
Argiñe Artolazabal lehendakariak eta Montse Alkorta zuzendariak eskerrak eman dizkiete ikastolaren izenean Kilometroak antolatzen ibili diren guztiei eta epe motzean ikastolak dituen bi erronken berri eman dute: Euskaraldia eta Errigora. Bietan izena ematera animatu dute jendea. Bukatzeko, haurrek margotutako Euskaraldiaren logoarekin argazkia atera dute eta tonbolako opariak zozkatu dituzte.
