Urretxuarrek San Joan jaiak ospatuko dituzte igandean eta astelehenean. Egunotan, beroketa lanak egiten ari dira. Asteburuan 3×3 saskibaloi txapelketa eta Lurraren Dantzari Txiki eguna egin zituzten eta asteartean gimnasia erritmika taldeak ikuskizuna eskaini zuen. Larunbatean, berriz, San Joan pilota txapelketako finalak jokatuko dira: 10:30etik aurrera, Ederrenan.
Ekitaldi nagusiak igandean eta astelehenean izango dira. Igandean, 18:00etan, bandak kalejira egingo du. Jose Mari Lasa plazatik abiatuko dira eta Gernikako Arbola plazan bukatuko dute, herriari buelta eman ostean. 20:00etan hirurrena egingo dute Santa Barbaran eta ondoren auzoko baserritarrek San Joan arbola jarriko dute. 21:00etan, Lizarriturri txistulari taldekoek kalejira egingo dute. San Joan bezperako ekitaldiekin bukatzeko, 22:30ean sua piztuko dute. Beti bezala, dantzariek, musikariek, bertsolariek eta txalapartariek parte hartuko dute eta iazko San Joan arbolari jarritako lore koroa sutara botako dute. Ondoren, plazan bertan, Uxue Kerejeta eta Andoni Oruesagasti zumarragarrek trikiti saioa eskainiko dute.
Astelehenean urretxuarrak Santa Barbarara igoko dira, San Joan eguneko erromeria ospatzera. Udal ordezkariak 10:00etan abiatuko dira udaletxetik, Lizarriturri txistulari taldekoek eta Lurra dantza taldekoek lagunduta. 10:45ean Zuhaitzaren Soinua txalapartari taldekoek deia egingo dute, Santa Barbaran bertan. 11:00etan meza hasiko da. Beti bezala, loreak bedeinkatuko dituzte. Udalak herritar guztiak loreak eramatera gonbidatu ditu. Lurra taldekoek elizan dantza egingo dute. Eta ondoren, kanpoaldean, agintariei aurreskua dantzatuko diete.
Toka txapelketa ere 11:00etan hasiko da. Tiraldiak 11:00etatik 13:15era eta 16:30etik 18:00etara izango dira. 16 urtetik gorakoek 2 euro ordaindu behar dute eta 16 urtetik beherakoentzat doan izango da. Sari banaketa ekitaldia 19:30ean izango da. Sari asko banatuko dituzte adin ezberdinekoen artean.
Irimora igoera
12:15ean Lurra taldekoek dantza saioa eskainiko dute eta 12:30ean Irimora igoera hasiko da. Parte hartu nahi dutenek herrikrosa.eus webgunean eman dezakete izena. Egunean bertan ere izena emateko aukera izango da. Kros txikian 2007tik 2012ra bitartean jaiotakoek parte hartuko dute eta igoeran gainontzeko guztiek. Irimora igoeran ere sari asko banatuko dituzte, adin ezberdinekoen artean. Sari banaketa ekitaldia 13:00etan izango da.
Ondoren, Santa Barbarako auzotarrek herri kirol desafioa egingo dute. Herri kirol proben artean bertso eskolako bertsolariek abestuko dute. Ondoren, herri bazkaria egingo dute.
Bazkalostean, 16:00etan, haur eta gaztetxoen erromeria hasiko da. Helduena 17:30ean izango da, Erdizka Lauetan taldearekin. Udalak haurrak eta helduak dantza egitera animatu ditu. 20:00etan herritarren ekitaldi kuttunetako bat hasiko da: irrintzi txapelketa. A mailan 8-15 urtekoek parte hartuko dute eta B mailan 16 urtetik gorakoek. Sariak banatu ondoren, herritar guztiak herrigunera jaitsiko dira kantuan eta saltoka. Jaitsiera Lizarriturri taldeko txistulariek, Iratzarri dultzainero taldeak eta trikitilariek girotuko dute. Aierbe ahizpek, Kerejetak eta Oruesagastik joko dute trikitixa.
Astelehenean Santa Barbarara autoan igo ahal izateko baimena eskatu behar da, udaltzaingoaren bulegoan. Bihar da horretarako azken eguna. Kuadrilla bakoitzeko bi baimen emango dira.
Aurten Pagoeta auzoko errepidea bakarrik erabili ahal izango da Santa Barbarara igotzeko. Nekolaldeko bidea jaisteko erabiliko da. Baimenik ez dutenak Erratzu industrialderaino eta Etxabururaino igo ahal izango dira.
Udalak autobus zerbitzua erabiltzera animatu ditu herritarrak. Aurten Jose Mari Lasa plazan egongo da geltokia. Autobus zerbitzua 10:00etan hasiko da eta 20:30ean amaituko da.
