Julen Alberdi azkoitiarra izan da norgehiagokako garaile, eta haren atzetik sailkatu da Ibai Soroa aribearra. Hirugarren postua, berriz, Xabier Zaldua zumarragarrak eskuratu du.
Ezkerrean Ibai Soroa, erdian Julen Alberdi eta eskuinean Xabier Zaldua. Euskal Duatloiaren finalean, Xabier Zaldua zumarragarrak hirugarren postua eskuratu du podiumean. Bigarren sailkatua Ibai Soroa aribearra (Nafarroa) izan da, eta txapela Julen Alberdi azkoitiarrak (Gipuzkoa) jantzi du. Horrela, bi gipuzkoarrek eta nafar batek osatu dute aurtengo podiuma. Guztira, 11 kirolarik hartu dute parte finalean.
Parte-hartzaileen artean, Zaldua izan da beteranoena, baina sasoi betean jarraitzen duela erakutsi du beste behin ere. 2023an seigarren postuan sailkatu zen, 2025ean bigarren izan zen, eta aurten hirugarren amaitu du.
Iazko formatuari eutsiz, aizkora eta korrikako lanak uztartu behar izan dituzte kirolariek. Lehenik, 45 ontzako enbor horizontala ebaki dute; ondoren, 45 ontzako enbor bertikala; eta amaitzeko, 500 metroko korrikaldia egin dute. Ariketa multzo hori lau aldiz osatu behar izan dute, eta, beraz, aizkorako eta korrikako lanak modu eraginkorrean uztartzea funtsezkoa izan da emaitza ona lortzeko.
Bero egin duen arren, maila paregabea erakutsi dute kirolariek, eta Tolosako zezen plaza jendez bete da.
