Urretxuko Udalak Sormonak egitasmoaren laugarren edizioan parte hartzeko gonbita luzatu die nerabeei
Egitasmo honen helburua sormena sustatzea eta nerabeen gaitasunak erdigunean jartzea da
Sormonaken laugarren edizioan parte hartzeko izen emate epea zabalik dago. Egitasmo honen helburua nerabeen sormenari bultzada ematea da. Barruko sutik abiatuta, haur garaian bezala, sormenarekin putzuetan jolasteko eta gozatzeko gonbidapena egin die Urretxuko Udalak 14-18 urte arteko nerabeei. Azaroaren 22a baino lehen eman beharko da izena, eta lanak martxoaren 7an aurkeztu. Amaierako jaia, berriz, martxoaren 18an izango da: 18:00etan, Pagoetan.
Sormonaken laugarren aldi honetan ere, sormena garatzeak osasunean, ongizatean eta garapenean dituen onurak azpimarratu nahi ditu Urretxuko Udalak. Horretaz gain, nerabezaroaren ikuspegi positiboa zabaldu nahi du, ohiko estereotipoei aurre eginez eta nerabeen gaitasunak, interesak eta ekimenak erdigunean jarriz.
Aurrekoetan bezala, lehiaketa ere izango da, baina, batez ere, sormen prozesu bat izango da: parte hartzaileek sortu nahi duten hori garatzeko baliabideak izango dituzte. Lan originalak nahiz beste lan batzuetan oinarritutako bertsioak aurkeztu ahal izango dira, edozein esparrutakoak: kultura eta arte arlokoak, baina baita beste eremu batzuetakoak ere. Prozesua bera sariak baino aberasgarriagoa izatea da udalaren asmoa.
Izena emateko, proiektuaren ideia zehaztu eta azaroaren 22a baino lehen aurkeztu beharko da, www.urretxu.eus/SMNK26 helbidean. Behin ideiak aurkeztuta, beharrezko baliabideak eskatzeko aukera izango da azaroaren 24tik aurrera, www.urretxu.eus/SMNK26_MATERIALA helbidean. Prozesu osoan zehar Gazteria sailaren laguntza izango dute parte hartzaileek, eta, behar izanez gero, komunitateko zein kanpoko adituena ere bai.
Lanak aurkezteko eguna martxoaren 7a izango da. Lan fisikoak Gazte Bideanen entregatu beharko dira. Digitalak, berriz, sustapena@urretxu.eus helbidera bidali behar dira. Sari banaketa eta amaierako jaia martxoaren 18an izango dira, 18:00etan, Pagoeta gune soziokulturalean. Bertan, zuzeneko musikaz eta jan-edanez gozatzeko eta aurkeztutako lanak ezagutzeko aukera izango da.
Prozesuan parte hartuko duten artistek eta adituek aukeratuko dituzte proiekturik berezienak, lau kategoriatan: bakarkako lan original bereziena, taldekako lan original bereziena, bakarkako lan eratorri bereziena eta taldekako lan eratorri bereziena. Kategoria bakoitzeko saridunak 200 euro jasoko ditu, proiektuari lotutako produktuetan, emanaldietan edota zerbitzuetan erabiltzeko, bailaran edota Euskal Herrian.
Parte hartzeko, 14 eta 18 urte bitartean izan beharko dira, eta urretxuarrak izan edo Urretxuko nahiz Zumarragako ikastetxeetan ikasi. Bakarka zein taldean parte hartu ahal izango dute. Proiektuek originalak edo eratorriak izan beharko dute, eta 2026ko azarotik aurrera sortuak. Hitza erabiltzen bada, idatziz nahiz ahoz, gutxienez %75 euskaraz izan beharko da. Sortutako lanen jabetza sortzaileena izango da.
Adimen artifiziala erabiliz gero, aitortu egin beharko da. Bestalde, baliabide materialak behar diren kasuetan, komunitateko saltokietan eskura daitezkeen baliabideekin egindako lanak lehenetsiko dira saritzeko.
Informazio gehiago jasotzeko, zalantzak argitzeko edo ekarpenak egiteko, sustapena@urretxu.eus helbidera idatzi daiteke.
