Sarrerak hilaren 22an banatuko dituzte, Zelai Arizti aretoan
Irrintzi dantza taldeak apirilaren 25ean egingo du 2026ko jaialdia. 19:00etan izango da, Zumarragako Zelai Arizti aretoan.
Aurtengo jaialdiaren izenburua Irrintziaren ahotsa da. “Gorputza mugitzen hasi aurretik, oinek dantzaren erritmoa margotu aurretik, soinu batek bidea irekitzen du. Garrasi zahar bat, eztarrian jaio eta airera jaurtia, mendien arteko zubi luze bat bailitzan: irrintzia. Irrintzia entzun dadila. Has dadila dantza”, azaldu dute Irrintziko kideek.
Haurren taldeetako eta helduen taldeko dantzariek hartuko dute parte eta zortzi musikari eta hiru abeslari izango dira zuzenean jotzen eta abesten. Kartela Nerea Murillok egin du.
Sarrerak hilaren 22an (asteazkena) banatuko dira, 19:00etan, Zelai Ariztiko leihatilan. Pertsona bakoitzeko bi sarrera emango dira, gehienez. Sarrerak doan banatuko dira.
Bestalde, urtero bezala gure Instagrameko kontuan (@irrintzidantzataldea) bi sarrera zozkatuko dituze. Bi sarrera horiek lortzeko ondorengoa egin beharko da: like eman argazkiari eta norbait aipatu iruzkinetan (nahi adina iruzkin egin daitezke). Zozketa astelehenean izango da, hilaren 20an, kontuan bertan.
