Euxebio Zabala zumarragarra mus jokalari bikaina da. Txapelketa asko irabazi ditu. Ekaitz semeak umetatik ikusi du aita musean jokatzen eta bera ere zalea da. Herriko txapelketetan elkarrekin parte hartzen dute. Uztaila hasieran Zumarragako jaietakoa irabazi zuten.
Euxebiok 68 urte ditu eta berak ere aitarekin, Alejandro Zabalarekin, ikasi zuen musean jokatzen. «12 urterekin jokatu nuen lehen txapelketa, aitarekin. La Salle-Legazpi ikastetxeko gimnasioan jokatu genuen lehen txapelketa hura. Lehen kanporaketa irabazi egin genuen eta bigarrenean kanporatu egin gintuzten. Aitarekin ikasi nuen musean jokatzen. Garai hartan asko jokatzen zen kartetan: musean, tutean…».
Aitarekin beste txapelketa pare bat jokatu zuen eta ondoren lagunekin hasi zen. «Unibertsitatera joan nintzen, irakasle-ikasketak egin nituen Ategorrietan, eta han ere asko jokatu nuen: musean, tutean, eskoban…».
Txapelketa asko irabazi ditu. Tartean, euskal kolektibitateen munduko txapelketa 2016an. Juan Karlos Kortarekin irabazi zuen. Inguruko herrietako txapelketa asko ere irabazi ditu: Alegin, Zaldibian… «Txapel gutxi ditut gordeta: munduko txapelketakoa eta Amalur elkartekoa».
Herriko txapelketetan semearekin parte hartzen du. «Kortarekin askotan jokatu dut, baina ez dut bikote finkorik. Herrian semearekin jokatzen dut». Ekaitzek ere oso gaztetan ikasi zuen musean jokatzen. «Bizitza guztian aita musean jokatzen ikusi dut. Etxean txapelak ikusten nituen eta nik ere jokatzeko gogoa nuen. Berarekin ikasi nuen, noski. Ondo zenbatzen eta malezia apur bat izaten irakatsi zidan: karta txarrei ahalik eta etekin handiena ateratzen, aurkaria baino abilagoa izaten, kartak ezkutatzen… 13-14 urterekin ikasi nuen. Urtezahar egunean familiarekin jokatzen genuen, Donostian».
Aitarekin jokatzeaz gain, lagunekin ere jokatzen du. «Kuadrillan zaletasun handia dugu, oso gaztetatik. Ingurukoek musean jokatzen zuten eta gu ere oso gaztetan hasi ginen. Herriko txapelketetan aitarekin jokatzen dut, baina herritik kanpoko txapelketa askotan ere parte hartzen dut. Izan ere, niri ere asko gustatzen zait musa. Lagunok herriz-herri ibiltzen gara. Zumarragako txapelketaz gain, Bergarakoa eta Azpeitikoa irabazi ditut».
Aita eta bera antzeko jokalariak direla dio. «Jokalari oldarkorrak gara. Iniziatiba eramatea gustatzen zaigu. Dena den, aitarekin jokatzen dudanean, berak agintzen du. Kuadrillakoekin jokatzen dudanean, berriz, iniziatiba eramatea gustatzen zait».
Garai bateko jokoa eta egungoa
Euxebio semearekin bat dator. Dena den, beteranoek eta gazteek ezberdin jokatzen dutela diote. Beteranoak oldarkorragoak dira. «Lehengo musa eta oraingoa ez dira berdinak. Jokatzeko modua aldatu egin da. Gazteok keinuak gehiago erabiltzen ditugu. Gehiago pentsatzen dugu. Beteranoek azkarrago erabakitzen dituzte jokaldiak. Ez dute horrenbeste pentsatzen. Nik jokatzeko bi moduak erabiltzen ditut: beteranoena aitarekin ikasi nuelako eta egungoa gaztea naizelako», azaldu du Ekaitzek.
Zaletasun handia dagoela diote. «Musak ez du indarrik galdu. Gazteek asko jokatzen dute. Gainera, asko ikasi dute. Guk baino gehiago pentsatzen dute. Gu agresiboagoak gara. Ezberdin jokatzen dute, baina ondo», aipatu du. Beteranoek Txoko eta Haizea tabernetan jokatzen dute, besteak beste. Gazteen tenplua, berriz, Laket taberna da.
