22 bikotek parte hartuko dute
Kirolzalek pilota txapelketa herrikoiaren 10. edizioa antolatu du. Lehen partidak abenduaren 30ean jokatuko dira. Lehen fasea ligaxka moduan jokatuko da eta bikoteek hiru mailatan banatuta parte hartuko dute. Bigarren fasean kanporaketak jokatuko dira. Bigarren fase horretan, bikote guztiek nahastuta jokatuko dute.
Lehen mailako ligaxkan lau bikotek parte hartuko dute: Rodriguez-Aleman, Jaunarena-Zubizarreta, Agirre-Tapiador eta Ibarluzea-Izagirre.
Bigarren mailako ligaxkan bost bikotek parte hartuko dute (ligaxkan azken sailkatzen dena kaleratua izango da): Del Rio-Escudero, Etxeberria-Fernandez, Sagastibeltza-Jauregi, Salaberria-Azkarate eta Antia-Aranburu.
Hirugarren mailako ligaxkan 13 bikotek parte hartuko dute: Hernandez-Larrea, Aleman II-Cruz, Uria anaiak, Garitano-Gastañares, Zabaleta-Salegi, Madina anaiak, Mendizabal-Etxaniz, Lizarralde-Lazaro, Aizpuru-Iturriotz, Zufiaurre-Zufiaurre II, Damian-Garcia, Garcia-Gabilondo eta Sasieta-Lopez. 13 bikote horiek hiru taldetan banatuta jokatuko dute eta talde bakoitzeko azkena kaleratua izango da.
Denentzako moduko txapelketa antolatu nahi izan dute. Onenek luzitzeko aukera edukiko dute, baina aldi berean jokatzeko prest dauden guztiei babesa eskainiko zaie, hasieran bere mailakoekin bakarrik jokatuko baitute.
Partidak 18 tantora jokatuko dira. Irabazleek bi puntu eskuratuko dituzte, galtzaileek puntu bat eta aurkezten ez direnek ez dute punturik jasoko. Berandu azaltzen direnek, minutu bakoitzeko tantu bat galduko dute. Ez da 10 minutu baino gehiagoko atzerapena onartuko. Sakea hirugarren koadrotik hirugarren koadrora izango da.
Final laurdenak arte, partidak larunbat goizetan jokatuko dira. Eguna aldatzea posible izango da, beti ere aurkariak prest badaude. Partidaren eguna aldatzeko azken eguna asteazkena izango da. Finalerdiak eta finala Goñiren omenezko txapelketako partiden aurretik jokatuko dira: asteazkenetan.
Lehen fasea abenduaren 30etik otsailaren 3ra jokatuko da, final hogeitamabirenak otsailaren 10ean jokatuko dira, final hamaseirenak otsailaren 17an, final zortzirenak otsailaren 24an, final laurdenak martxoaren 2an, lehen finalerdia martxoaren 13an, bigarren finalerdia martxoaren 20an eta finala martxoaren 27an.
Babesle nagusia Zuzen zerbitzu grafiko enpresa da eta Kirolzalek Zumarragako Udalaren kolaborazioarekin antolatu du txapelketa.
