Mineralak eta fosilak ez dira izaki bizidunak, baina Urretxuko mineralen eta fosilen museoa oso bizirik dago. Urtero Euskal Herri osoko milaka lagunek bisitatzen dute eta museoko arduradunek berritzeko eta hobetzeko lan egiten dute etengabe. Atzo, ikaskuntza digitala eta abentura batzen dituen egitasmoa eta Museoen Egunaren inguruan antolatutako ekitaldiak aurkeztu zituzten. Hori gutxi balitz, azaroko Mineralogia eta Paleontologia Asteko erakusketa monografikoaren berri eman zuten.
Aurkezpen ekitaldian Jon Luqui alkateak, Javier Aguado museoaren sustatzaileak eta jolasa prestatu duen Artelatz enpresako Juan Unzuetak parte hartu zuten. Jolasarekin museoak beste pauso bat eman nahi du dibulgazio eta hezkuntza lanetan, bere edukia espazio fisikotik harago zabalduz. Museora joan aurretik webgunetik pasatzen direnek, Urretxun aurkituko dutena hobeto barneratuko dute.
Eduki didaktiko digital interaktiboa LHko ikasleei zuzendua dago bereziki, baina publiko orokorrarentzat ere erakargarria delakoan daude. Helburua jakin-mina piztea, museoa bisitatzera animatzea eta ikastetxeei baliabide pedagogiko berriak eskaintzea da, museoko bisitaren aurretik zein ondoren ikaskuntza sakontzeko aukera emanez. «Azken urteetako esperientziak erakutsi du bisitari askok ez dutela garbi zer museotara doazen edo non dauden. Horregatik, aurkezten den proposamenak museoa lehenagotik ezagutzeko ateak ireki nahi ditu», azaldu zuen Unzuetak.
Webguneko atal berriak (Urretxu.eus webgunean, Urrelur museoaren barruan, Bizi Urrelur abentura!) jarduera interaktiboak eta jolasa ditu. Urretxuko Udalak komunikazio kanpaina bat egingo du ikasturte hasieran eduki digital berriak ezagutzera emateko.
Emakume zientzialariak
Atzoko aurkezpenean Museoen Egunaren inguruan antolatutako ekitaldien berri ere eman zuten. Maiatzaren 21ean, 17:00etatik 19:00etara, zientzia saioak egingo dituzte. 6 eta 12 urte arteko haurrek parte hartu ahal izango dute. Emakume zientzialariek kimikaren arloan egindako ekarpenak nabarmenduko dituzte, esperimentu praktiko eta dibertigarrien bidez. Marie Curie, Rosalind Franklin, Dorothy Crowfoot eta beste aitzindari batzuek egindak aurkikuntzak ikasiko dituzte.
Izena ematen duten haurrek hiru saiotan parte hartuko dute: hare mugikorra (fluido berezia, kolpatzen denean gogorra eta kontu handiagoz ukitzen denean likidoa), sua eskuan (su berezia eskuan eutsi daiteke) eta elur artifiziala (urarekin, elurraren antzeko materiala sortzen da). Izen-ematea bihar irekiko da. Izena emateko urrelur@urretxu.eus helbide elektronikora idatzi behar da.
Mineralogia eta paleontologia txangoa ere antolatu dute. Burgosko (Espainia) Lorara eta Merindadeetara joango dira, hilaren 16an. Hurrengo egunean itzuliko dira. Plaza guztiak bete dira: 38 lagun joango dira.
Horretaz gain, Aguadok udazkeneko Mineralogia eta Paleontologia Asteko protagonistetako bat burdina izango dela aurreratu zuen. «Burdinarekin eta egurrarekin lan egiten duten artistak ekarriko ditugu. Gorka Salmeron, Juan Mari Burguera eta Ricardo Mediavilla legazpiarrak etorriko dira», esan zuen.
